काठमाडौं । नेपाल राष्ट्रिय तथा अन्तराष्ट्रिय खेलाडी संघ (एनएनआईपीए)ले प्रदान गर्ने 'एनएनआईपीए बर्ष उत्कृष्ट खेलाडी’ अवार्डलाई जनता बैंकले प्रायोजन गरेको छ । आगामी पुस दोस्रो साता आयोजना हुने अवार्डका लागि जनता बैंकले प्रायोजन गरेको हो ।
एनएनआईपीए र जनता बैंकबीच आइतबार १० लाख बराबरको पाचँ बर्षे प्रायोजन सम्झौता पत्रमा हस्ताक्षर भएको छ । एनएनआईपीएका अध्यक्ष दिपक श्रेष्ठ र जनता बैंकका डेपुटी सिईओ अजय मिश्रले सम्झौता पत्रमा हस्ताक्षर गरे ।
सम्झौतासगैं जनताले यस बर्षबाट प्रदान गरिने दुई सर्वोकृष्ट बर्ष खेलाडीलाई प्रदान गरीने १\१ लाख नगद पुरस्कार उपलब्ध गराउने छ । संघले यस बर्षबाट २९ खेलका उत्कृष्ट खेलाडीमध्ये एक महिला र एक पुरुषलाई सम्मान गर्ने जनाएको छ ।
सम्झौतापछि बोल्दै जनताका सिईओ मिश्रले देशको लागि खेल्ने खेलाडीलाई सानो सहयोग गरेको बताए । आगामी दिनमा थप सहयोग गर्न तयार रहेको उनले बताए । यस्तै एनएनआईपीएका अध्यक्ष श्रेष्ठले खेलाडीको लागि निजी क्षेत्रको सहयोग आवश्यक रहेको बताउदै खेलाडीलाई सहयोग गरेको बैंकलाई धन्यवाद दिए ।
एनएनआईपीएले हरेक बर्ष प्रदान गर्दै आएको अवार्ड पुसको १३ गते प्रदान गरिदै छ । ललितपुरस्थित पाटन दरबार स्क्वायरमा आयोजना हुने अवार्ड कार्यक्रममा २९ खेलका उत्कृष्ट खेलाडी 'एनएनआईपीए वर्ष उत्कृष्ट खेलाडी’ बाट सम्मानित हुनेछन् ।
गत बर्ष ३५ खेलका खेलाडी सम्मानित भएपनि यस पटक २९ खेलका खेलाडीलाई मात्र सम्मानित गरिनेछ । एनएनआईपीएले राष्ट्रिय खेलकुद परिषद (राखेप) ले आयोजना गरेको राखेप च्याम्पियनसिपमा सहभागी खेललाई समावेश गरेको जनाएको छ ।
यसपटक फुटबल, पौडी, भलिबल, टेबल टेनिस, सुटिङ, बक्सिङ, भारोत्तोलन, लन टेनिस, सफ्ट टेनिस, कबड्डी, फेन्सिङ, हक्की, स्क्वास, सेपाताक्रो, साइक्लिङ र खोखो रहेका छन् । यस्तै बास्केटबल, तेक्वान्दो, आइटीएफ तेक्वान्दो, ब्याडमिन्टन, ट्रायथलन, ह्याण्डबल, कराते, जुडो, उसु, आर्चरी, एथलेटिक्स, गल्फ र कुस्ती समावेश छन् ।
यस पटक क्रिकेट खेल समावेश गरिएको छैन । गत बर्ष क्रिकेट खेल समावेश गरिएको थियो । सम्मानित हुने २९ खेलका प्रत्येक खेलाडीले १० हजार नगद पाउने छन् । यस्तै विजेता खेलाडीको फोटोसहितको क्यालेन्डर प्रकाशन हुने छ ।
त्यस्तै, अवार्ड कार्यक्रममा पहिलो अन्तराष्ट्रिय धावक गजराज जोशीको नाममा रहेको ‘गजराज आदर्श खेलाडी’ बाट एक जनालाई सम्मान गरिनेछ । गजराज आदर्श खेलाडीको विजेताले २५ हजार नगद प्राप्त गर्नेछन् ।
यस बर्षपनि एक जना खेल पत्रकारलाई एनएनआईपिए पत्रकारिता पुरस्कारबाट सम्मानित गर्ने जनाएको छ । जसको पुरस्कार राशी नगद १५ हजार रहेको छ ।
