काठमाडौं । छैटौं संस्करणको नेपालगन्ज म्याराथनको उपाधि हात पार्दै टोकियो ओलम्पिकमा छनोट भएका धावक गोपीचन्द पार्कीले आफ्नो लक्ष्य नेपाली म्याराथन इतिहासको कीर्तिमान भङ्ग गर्ने रहेको बताएका छन् ।
विभागीय टिम एपीएफ क्लबका खेलाडी पार्कीले शनिबार नेपालगन्जमा आयोजना भएको नेपालगन्ज म्याराथनको उपाधि हात पारेका थिए । त्रिभुवन आर्मी क्लबका कृष्ण बस्नेतलाई पछि पारेका पार्कीले निर्धारित दुरी २ घण्टा १८ मिनेट ५९ सेकेण्डमा पुरा गरेका थिए ।
कोरोना महामारीको कारण छनोट प्रतियोगिता हुन नसकेपछि नेपाल ओलम्पिक कमिटी (एनओसी) ले यसै प्रतियोगितालाई छनोटको माध्यम बनाएको थियो । एनओसीले नेपालगंज म्याराथनको विजेतालाई जापानको ओलम्पिकमा सहभागीता गराउने निर्णय गरेको थियो ।
ओलम्पिकमा छनोट भएपछि खेलपाटीसँग कुरा गर्दै पार्कीले ओलम्पिक प्रतिस्पर्धामा बैकुण्ठ मानन्धरको नाममा रहेको कीर्तिमान तोड्ने लक्ष्य भएको बताए ।
‘आगामी ओलम्पिक छनोटमा सबैको लक्ष्य भनेको उपाधिनै हो । मेरो पनि उपाधि सहित बैकुण्ठ गुरुको नाममा रहेको ३५ वर्षे इतिहास ब्रेक गर्नु हुनेछ,’ पार्कीले भने ।
कीर्तिमानी धावक मानन्धरले अन्तराष्ट्रिय म्याराथनमा निर्धारित दुरी २ घण्टा १५ मिनेट ०३ सेकेण्डको कीर्तिमान आफ्नो नाममा राखेका छन् । सन् १९८७ मा उनले बनाएको यस कीर्तिमान अहिलेसम्म तोडिएको छैन ।
पार्कीले यसै प्रतियोगिताका लागि भनेर विगत लकडाउनमा पनि निरन्तर अभ्यास गरिरहेको र त्यसको प्रतिफल पाएको समेत बताए ।
‘लक डाउनमा राम्रो तयारी भयो । कहिलै ब्रेक भएन । रिजल्ट पनि राम्रो आयो । खुसी छु,’ पहिलो पटक ओलम्पिक छनोट भएका पार्कीले भने ।
पार्की नेपालमा आयोजना भएको १३ औं दक्षिण एसियाली प्रतियोगिता (साग) अन्तर्गत ५ हजार मिटर दौड प्रतियोगिताको स्वर्णधारी समेत हुन् । उनले निर्धारित समय १४ मिनेट ५४ दशमलब २० सेकेण्डमा पुरा गरेका थिए । पार्कीले भारतीय खेलाडी सुनिल दवारलाई पछि पारेका थिए ।
पार्कीले समयमै दौड सुरु नहुँदा नेपालगन्ज म्याराथनमा लक्ष्य अनुसारको समय निकाल्न असफल भएको समेत बताए ।
‘नेपालगन्जमा गर्मीले गर्दा समय पनि बढि भयो । खेल ढिला गरि हुँदा घामले अलि समस्या भयो,’ उनले सुनाए ।
पार्कीले अबको समय ओलम्पिकका लागि खर्चने र मानन्धरको कीर्तिमान भङ्ग गर्नेमा आफु आशावादी भएको बताए ।
1680071153.jpg)
