काठमाडौं । एएफसी यू–२३ एसिया कप छनोटमा नेपाली टिम सहभागी नगराउने निर्णयपछि अखिल नेपाल फुटबल संघको चर्को आलोचना सुरु भएको छ । अर्को वर्ष कतारमा हुने एएफसी यू–२३ एसिया कपका लागि खेलिने छनोट प्रतियोगितामा एन्फाले नेपालको नाम समावेश गरेन । आर्थिक अभावको कारण देखाउँदै एन्फाले नाम समावेश नगरेपछि सोमबार सार्वजनीक सहभागी टिममा नेपालको नाम थिएन । एएफसीले सहभागी देशको वरियताका आधारमा सोमबार छनोट प्रतियोगिताको विस्तृत विवरण सार्वजनीक गरेको छ । प्रतियोगिताको 'ड्र' आगामी बिहीबार हुदैछ ।
छनोट प्रतियोगितामा ४३ टिम खेल्ने भएका छन् । सेप्टेम्बर ४ देखि १२ सम्म ११ मैदानमा प्रतियोगिताका छनोट खेल हुनेछन् । सहभागी टिमहरु मध्य चार-चार टिम समावेश गरेर १० वटा समूह र तीन टिम सहभागी गराएर अन्तिम एक समूह तयार गरिनेछ । सिंगल राउण्ड रोविनका आधारमा प्रतियोगिता हुनेछ । समूहको विजेता टिम र उत्कृष्ट चार उपविजेता टिमले कतारमा हुने एसिया कपमा सहभागीता जनाउनेछन् । प्रतियोगिता सन् २०२४ अप्रिल १५ देखि मे ३ सम्म कतारमा हुनेछ ।
तर उमेर समूहको एसिया कप पुग्ने छनोट प्रतियोगितामा एन्फाले नेपाली टिम सहभागी गराएन । उमेर समूहको टिम र प्रतियोगितालाई विश्व फुटबलमा राष्ट्रिय टिम निर्माणको आधार मानिन्छ । तर आर्थिक कारण देखाउँदै उमेर समूहको एसिया कप छनोटमा टिम सहभागी नगराएपछि एन्फा र फुटबल नेतृत्वको चर्को आलोचना सुरु भएको हो । असक्षम नेतृत्वका कारण उमेर समूहको नेपाली टिम अन्तराष्ट्रिय सहभागीताबाट बञ्चित हुन परेको भन्दै सार्वजनीक रुपमा एन्फा र यसको नेतृत्वको आलोचना भैरहेको हो ।
एन्फा प्रवक्ता सुरेस शाहले सञ्चार माध्यममा आर्थिक कारणले नेपाली टिम प्रतियोगितामा समावेश गर्न नसकिएको पुष्टि गरेका छन् ।
‘सेभ नेपाल फुटबल’ भन्ने नाराको साथ एन्फा नेतृत्वमा आएका अध्यक्ष पंकज बिक्रम नेम्वाङ र उनको टिम अहिले फुटबल चलाउनै नसक्ने अवस्थामा पुगेको देखिन्छ । ‘लटरपटर’ ए डिभिजन लिग सञ्चालन गरेका नेम्वाङले चालू आर्थिक वर्ष सकिनै लाग्दा समेत बी र सी डिभिजन फुटबलको मिति तोक्न सकेका छैनन् । यस वर्ष बी र सी डिभिजन लिग नहुदाँ अर्को वर्षको लिगको चक्रनै बिग्रने अवस्था देखिन्छ ।
नेम्वाङ एन्फा नेतृत्वमा आएको पहिलो वर्षमै महिला लिग, उमेर समूहको प्रतियोगिता, जिल्ला, प्रदेश लिगका अधिकांश फुटबल कार्यक्रम धरासायी अवस्थामा छ । नेतृत्वको क्षमता नपुगेर घरेलु फुटबल चल्न सक्ने अवस्थामा छैन भने अन्य पदाधिकारी पद र पैसाको ‘छिर्के दाउ’मा लाग्दा नेपाली फुटबल जोखिमपूर्ण अवस्थामा छ । त्यसैको उदाहरणको रुपमा यू–२३ एसिया कप छनोटको घटना सतहमा आएको हो ।
-1751297393.jpeg)
-1751282483.jpeg)
-1751282194.jpeg)
