काठमाडौं । ए डिभिजन लिगका क्लबहरुले बजारमा खेलाडी अभाव रहेको जनाउँदै विदेशी खेलाडीको कोटा बढाउन एन्फासँग माग गरेका छन् । ए डिभिजनका अधिकांश क्लबले आफुहरुलाई खेलाडी अभाव रहेको भन्दै विदेशी खेलाडीको कोटा थप्न माग गर्दै एन्फामा पत्र बुझाएका छन् ।
राष्ट्रिय टिमका अधिकांश खेलाडी विदेश गएको र बजारमा समेत राम्रा खेलाडी पाउन नसकिएको भन्दै क्लबहरुले सामुहिक रुपमा विदेशी खेलाडीको कोटा बढाउन एन्फासँग माग गरेका हुन् ।
ए डिभिजनका ११ वटा क्लबले विदेशी खेलाडीको कोटा बढाउने माग सहितको पत्र लिग निर्देशक सञ्जिव मिश्रलाई बुझाएका छन् । तीन विभाग बाहेकका ए डिभिजन खेल्ने अधिकांश क्लबले राम्रा खेलाडी विदेश गएको भन्दै बजारमा खेलाडी अभाव रहेको उल्लेख गरेका छन् ।
पछिल्लो समय राष्ट्रिय फुटबल टिमका अधिकांश खेलाडी अष्ट्रेलिया पुगेका छन् । सुरक्षित भविष्यको खोजीमा धेरै खेलाडीले अष्ट्रेलिया सहितका देशलाई नयाँ गन्तब्य बनाएका छन् । राष्ट्रिय टिममात्र नभएर माथिल्लो स्तरको फुटबल खेल्ने अधिकांश खेलाडीको रोजाई अष्ट्रेलिया बन्न थालेको छ । धेरै खेलाडीले अष्ट्रेलियामा भिषा आवेदन दिएर प्रतिक्षा गरेर बसेका छन् । क्लबमा अनुबन्ध भएका खेलाडी पनि आसन्न लिगको दौरान विदेश उड्ने चिन्ताबाट क्लबहरु गुज्रिरहेका छन् ।
राष्ट्रिय टिमका अधिकांश खेलाडी विदेश लागेपछि क्लबलाई राम्रा खेलाडीको अभाव देखिएको छ । बजारमा राम्रा खेलाडी नपाउँदा क्लबले लिगको तयारी समेत अघि बढाउन सकेका छैनन् । राम्रा खेलाडी नहुँदा लिगको स्तर घट्ने चिन्ता सरोकारवालाले ब्यक्त गरिरहेका छन् ।
‘क्लबलाई खेलाडीको अभाव छ । राम्रा खेलाडी पनि बजारमा छैनन् ।’ ए डिभिजन क्लबका एक पदाधिकारीले खेलपाटीसँग भने, ‘लिगलाई प्रतिस्पर्धात्मक बनाउन पनि राम्रा खेलाडी क्लबमा चाहिन्छ । सोही कारण विदेशी खेलाडीको कोटा वृद्धि गर्न माग गर्दै एन्फालाई अनुरोध गरेका छौं ।’
क्लबहरुले दक्षिण एसियाली देशबाट थप एक विदेशी खेलाडी राख्न सक्ने व्यवस्था गर्न एन्फासँग माग गरेका छन् । एन्फाको लिग निर्देशिकामा लिगमा तीन विदेशी र एक एसियन गरि चार विदेशी खेलाडीलाई क्लबले एक सिजनका लागि दर्ता गर्न सकिने प्रावधान छ ।
एन्फाले यस सिजनको लिग फागुन १९ गतेबाट सञ्चालन गर्दैछ । यस सिजन डबल राउण्ड रोबिनका आधारमा लिग सञ्चालन हुदैछ । तीन महिनामा डबल लिग सञ्चालन हुँदा खेलाडीको चोटको समस्या समेत बढ्ने क्लबको चिन्ता छ । सोही कारण विदेशी खेलाडीको कोटा थप गर्दा टिमको तयारी सहज हुने क्लबहरुको माग छ ।
एन्फाले यस सिजनको लिगको निर्देशिका बनाएर पारित गरिसकेको छ । निर्देशिकामा एक एसियन गरि चार विदेशी खेलाडी राख्न पाउने प्रावधान छ । यसअघिको बैठकमा विदेशी खेलाडीको कोटा थप्ने विषयमा कार्यसमिति सदस्यले विरोध गरेका थिए ।
‘क्लबहरुको मागमा एन्फा सकारात्मक छ ।’ एन्फाका एक अधिकारीले भने, ‘यसअघि कार्यसमिति बैठकमा यसको विरोधनै भएको थियो । तर समयको चाप र खेलाडीको अभाव हेर्दा क्लबको माग सम्बोधन गर्नु पर्नेनै देखिन्छ ।’
1680159079.JPG)
