काठमाडौं । नेपाली राष्ट्रिय फुटबल टिमले आज मंगलबार दक्षिण एसियाली प्रतिद्वन्दी बंगलादेशविरुद्ध एक मैत्रीपूर्ण खेल खेल्दैछ ।
घरेलु मैदान दशरथ रंगशालामा नेपालले फिफा इन्टरनेसनल विन्डो अन्तर्गत बंगलादेशविरुद्ध मैत्रीपूर्ण खेल खेल्न लागेको हो । नेपाल र बंगलादेशबीचको खेल साँझ ५:३० बजे सुरु हुनेछ ।
घरेलु भूमिमा नेपाल बंगलादेशलाई हराएर समर्थकलाई दशैंको उपहार दिन चाहन्छ । नेपाली टोलीका कार्यवाहक मुख्य प्रशिक्षक प्रदिप हुमागाईले बंगलादेशविरुद्ध जितकै लागि खेल्ने बताएका थिए ।
तर, बंगलादेशविरुद्ध भिड्नु अघि घरेलु टोली नेपाल भने दवाबमा छ । नेपाल अन्तिम पटक मैदानमा एएफसी एसियन कप छनोटको तेस्रो चरणमा उत्रिएको थियो । त्यसमा पनि अहिले पुनरागमन गरेका अधिकांश खेलाडी तत्कालिन प्रशिक्षक अब्दुल्लाह अल्मुताईरीसंगको विवादका कारण बाहिर रहेका थिए ।
कप्तान किरणलाई छाड्ने हो भने धेरैजसो खेलाडीले नियमित खेलेका पनि छैनन् । नवनियुक्त कार्यबाहक प्रशिक्षक प्रदिपलाई लामो समय मैदान बाहिर रहेका खेलाडीको खेललाई अन्तराष्ट्रिय स्तरमा एक्कासी 'सेप' मा राख्न चुनौती छ । त्यति मात्र होइन उनीहरुको 'म्याच फिटनेस' ठ्याक्कै दावा गरेर ठिक छ भन्न सकिने अवस्था पनि देखिदैन ।
अन्तिमपटक गत फेब्रुअरीमा उनीहरुले नेपालको मौरिससविरुद्धको मैत्रीपूर्ण खेलमा राष्ट्रिय जर्सी लगाएका थिए । त्यसपछिका केहि अन्तराष्ट्रिय मैत्रीपूर्ण र एएफसी एसिएन कप छनोट खेलेको टोलीबाट आधा भन्दा बढी खेलाडीलाई अहिले बाहिर राखिएको छ । नेपाली खेलाडीलाई बंगलादेशजस्तो टोलीविरुद्ध रिदम समात्न कठिन त हुने नै छ । त्यसैले कप्तान किरणले फिफा वरीयतामा प्रभाव पार्ने हुँदा बंगलादेशविरुद्धको मैत्रीपूर्णलाई महत्वपूर्ण खेलको रुपमा लिएको र उनीहरुविरुद्ध खेल्न कठिन हुने बताएका थिए ।
नेपाली टोलीलाई अर्को दवाब मानसिक रुपमा पनि छ । साफ च्याम्पियनशिपको फाइनल पछि यो अन्तरालमा नेपाली टोली विभिन्न उतार चढावबाट गुज्रिएको छ । एन्फा नेतृत्व परिवर्तन भएको छ । सिनियर खेलाडीहरु टोली छाडेर फर्किएका छन् । अल्मुताईरी प्रशिक्षक रहेनन् । फुटबलमा विवाद, गुट उपगुट, पक्ष विपक्ष, आरोप प्रत्यारोपबाहेक अरु केहि देखिएन । राष्ट्रिय टोलीका खेलाडी विदेश पलायन भईरहेका छन् । घरेलु फुटबल पनि लटरपटरमै अल्झेको छ । अनुशासन तोडेको भन्दै निकालिएका १० जना खेलाडीलाई राजनीतिक फाइदाको लागि फेरि बोलाएर, अल्मुताईरीले तयार पारेका युवा खेलाडीमाथि अन्याय गरेको आरोप अल्मुताईरी पक्षधरहरु लगाइरहेका छन् । उनीहरु अझै प्रदिपलाई प्रशिक्षक स्विकार्न सकिरहेका छैनन् ।
मैदान बाहिर उठिरहने यस्ता आवाज र घटिरहने यस्ता घटनाले वर्तमान नेपाली टोलीलाई 'हार्ने छुट' दिएको छैन । एक कोणबाट हेर्ने हो भने वर्तमान एन्फा नेतृत्व आएपछिको राष्ट्रिय टोलीको पहिलो अन्तराष्ट्रिय खेल पनि भएको हुँदा यो खेल नेपाली टोलीको आगामी फुटबल कस्तो हुनेछ भन्ने कुराको 'फर्स्ट लुक' हुने अनुमान छ । वर्तमान एन्फाले खिचेको पहिलो तस्बिर कति 'क्लियर' आउला त्यसको पर्खाइमा फुटबल जगत छ ।
उता बंगलादेश पनि नेपाललाई हराएर मैत्रीपूर्णमा लगातार दोस्रो जित निकाल्न चाहन्छ । बंगलादेश कम्बोडियासँग एक मैत्रीपूर्ण खेल खेलेर नेपाल आएको हो । उसले मैत्रीपूर्णमा कम्बोडियालाई १-० गोल अन्तरले हराएको थियो । तुलनात्मक रुपमा नेपालभन्दा बंगलादेश राम्रो रिदममा छ भन्न सकिन्छ । बंगलादेशका स्पेनी प्रशिक्षक जाभिएर फर्नान्डेज क्याब्रेराले कम्बोडिया माथिको जित पछि आफ्नो जागिर बचाएका छन् । लगातार हारको नतिजा आत्मसाथ गरेपछि प्रशिक्षकको आलोचना भैरहेको थियो । अन्तत: उनि कम्बोडियाविरुद्ध आएको जितले केहि राहत को स्वास फेरिरहेका छन् । त्यसैले धेरै संघर्षपछि आएको राहतलाई उनी निरन्तरता दिन चाहन्छन ।
उनले आफ्नो टोलीलाई ४ दिन अघिनै यहाँको वातावरणसँग अभ्यस्त हुनको लागि नेपाल उतारे । पछिल्लो समय उनको खेलशैलीले दक्षिण एसियामा रियल मड्रिडको झल्को दिरहेको छ । स्वाभाविक रुपमा स्पेनी प्रशिक्षक मड्रिडबाट प्रभावित छन । कम्बोडियाविरुद्ध जुन सेटअपमा उनले खेलाए त्यो हेर्दा लाग्छ उनी एक्सपेरिमेन्ट गर्न डराउदैनन । बक्समा कम्प्याक्ट डिफेन्स राखेर काउन्टर र प्रेसिंगमा गोल खोज्ने शैली अपनाएका छन् । बंगलादेशको प्रगति यसैपनि अन्य टोलीको लागि सिख बनिरहेको अवस्थामा यदि नेपालविरुद्ध जित हासिल गर्न सके जाभिएर फर्नान्डेज क्याब्रेरा यहि शैलीमा खेल्ने आफ्नो निर्णयमा ढुक्क हुन सक्छन ।
नेपालले बंगलादेशविरुद्ध हालसम्म २४ पटक प्रतिस्पर्धा गरेको छ । जसमा बंगलादेशले १२ खेल जितेको छ भने नेपालले ७ खेल मात्रै जितेको छ । ५ खेल बराबरीमा सकिएको छ ।
सन् १९८३ मा नेपालले बंगलादेशसँग पहिलो पटक खेलेको थियो । मर्डेका कपमा नेपाल बंगलादेशसँग १–० गोल अन्तरले पराजित भएको थियो । नेपालले पछिल्लो पटक बंगलादेशविरुद्ध गत वर्षको असोजमा खेलेको थियो । माल्दिभ्समा आयोजना भएको साफ च्याम्पियनसिप फुटबल अन्तर्गतको त्यस भेटमा नेपाल र बंगलादेशले १-१ गोलको बराबरी खेलेको थियो । उक्त खेलमा सुमन रोजाको गोलबाट बंगलादेशले अग्रता लिएको थियो । तर, अन्जन विष्टले पेनाल्टीबाट गोल गर्दै नेपाललाई बराबरीमा ल्याएका थिए । त्यसको करिब एक वर्षपछि नेपालले बंगलादेशसँग खेल्न लागेको हो । नेपालले पछिल्लो पटक घरेलु मैदानमा बंगलादेशलाई हराएको थियो । थ्री नेसन्स कपमा २०७७ चैत १६ गते त्रिपुरेश्वरस्थित दशरथ रंगशालामा नेपालले बंगलादेशलाई २-१ ले हराएर उपाधि जितेको थियो ।
जहाँ फुटबल बिकासको योजनामा एन्फा प्रशासन लागातार आलोचना खेप्दै आइरहेको छ त्यहीं बंगलादेश फुटबल संघ मैदान भित्र मात्र होइन मैदान बाहिर पनि सफलता र तारिफ बटुलिरहेको छ । पछिल्लो समय त यूईएफएले समेत बंगलादेशलाई सहयोग गर्न थालेको छ । भर्खरै मात्र युरोपियन फुटबल महासंघले बिएफएफलाई बस लगायत अन्य सुबिधा उपलब्ध गरेको थियो । उनीहरुको महत्वाकांक्षाको एएफसीले समेत प्रशंशा गर्छ । फिफाले उनीहरुको दृढता हेर्दै खेलाडीको फिजकल स्ट्रेन्थ बढाउन न्युट्रिसन् प्रोग्रामहरु बंगलादेशलाई प्रदान गर्दै आइरहेको छ ।
फुटबल विकासको रोडम्यापमा लगातार ओरालो लागिरहेको नेपाल र उकालो चढीरहेको बंगलादेशबीच हुने खेलले दक्षिण एसियाली फुटबलमा भारतपछि दोस्रो स्थानमा कसले पकड राख्ने भन्ने कुराको छिनोफानो हुनेछ । र आउने दिनमा पनि यो प्रतिष्पर्धा जारि नै रहनेछ । तर एउटा यथार्थ के हो भने यदि सबै कुरा यसरि नै अगाडी बढिरह्यो भने बंगलादेशले नेपाललाई धेरै पछाडी छाड्ने निश्चित छ ।
विजयादशमीको शुभकामना ।
