काठमाडौं । एन्फा अध्यक्षमा पंजकबिक्रम नेम्वाङ निर्वाचित भए लगत्तै राष्ट्रिय फुटबल टिमका मुख्य प्रशिक्षक अब्दुल्लाह अलमुताईरीले भनेका थिए, ‘नेपाल सधै मेरो ह्दयमा छ । तर सबै कथाको अन्त्य हुन्छ । माया र सहयोगका लागि हार्दिक कृतज्ञता ।’ उनले नेपाल बसाई उत्कृष्ट भएको भन्दै नेपाली फुटबलको उज्वल भविष्यको कामना पनि गरे ।
एसियन कपको छनोट सकेर बिदा मनाईरहेका अलमुताईरीले एन्फामा नेतृत्व परिवर्तन हुने बित्तिकै नेपाल नफर्कने संकेत गरेका थिए । उनै आफैले केही अन्तरवार्तामा तत्कालिन अध्यक्ष कर्माछिरिङ शेर्पा बाहेकको नेतृत्वसँग काम नगर्ने बताएका थिए । नेपाल बसाईको दौरान उनको तत्कालिन वरिष्ठ उपाध्यक्ष नेम्वाङसँग ‘वार’नै पर्यो । उनै नेम्वाङ अध्यक्ष बनेर एन्फामा आएका छन् । अलमुताईरीको नेपाल भविष्य अझै अन्यौलग्रस्त देखिएको छ ।
एन्फामा नेतृत्व परिवर्तन भए लगत्तै अलमुताईरीको भविष्यलाई लिएर विभिन्न अडकलबाजी सुरु भएको थियो । विश्व फुटबलमा मुख्य प्रशिक्षकले संघसँग मिलेर काम गर्ने हो । सम्बन्धित संघले पनि आफ्ना योजना, कार्यक्रम र लक्ष्य प्रशिक्षक मार्फतनै मैदानमा लागु गर्ने हो । तर फुटबल संघमा नेतृत्व परिवर्तन भएसँगै एन्फा र मुख्य प्रशिक्षक कसरी अघि बढ्छन्, प्रस्ट दृष्य आईसकेको छैन ।
नेतृत्वमा आउने बित्तिकै एन्फा अध्यक्ष नेम्वाङ नेतृत्वको कार्यसमितिले मुख्य प्रशिक्षकले अपमानपूर्वक निकालेका राष्ट्रिय टिमका १० खेलाडीलाई राष्ट्रिय टिममा फिर्ता बोलाउने निर्णय गर्यो । र मुख्य प्रशिक्षकको सन्दर्भमा छानविन प्रतिवेदन अनुसार आवश्यक काम कारबाही अघि बढाउन महासचिव किरण राईलाई जिम्मेवारी दिएको थियो । नेतृत्वमा आउने बित्तिकै नेम्वाङले खेलाडीलाई राष्ट्रिय टिममा फिर्ता बोलाउने बाचा पुरा गरे । तर प्रशिक्षक बारे निर्णय गर्ने अधिकार नेम्वाङलाई मात्र थिएन ।
साना साना कुरामा पनि राष्ट्रिय टिम छाड्ने धम्की दिने अलमुताईरीलाई ‘साईज’मा राख्न तत्कालिन अध्यक्ष कर्माछिरिङ शेर्पाले कतार फुटबल संघ, प्रशिक्षक अलमुताईरी र एन्फाबीच त्रिपक्षिय सम्झौता गरेका थिए । त्यही सम्झौता एन्फाका लागि अहिले घाँडो बनेको छ । अलमुताईरी त्रिपक्षिय सहमती नभई जिम्मेवारीबाट निस्कन मिल्दैन, एन्फाले एक्लै अलमुताईरीलाई पनि हटाउन सक्दैन ।
स्वास्थ्य अवस्था पनि ठिक नभएका मुख्य प्रशिक्षकले दुब्र्यवहारबाट राष्ट्रिय टिमबाट खेलाडी निकालिएको घटनाबारे छानविन गर्न गठित समितिले कतार फुटबल संघसँग समन्वय गरेर अलमुताईरीको विकल्प खोज्न सुझाव दिएको थियो । त्यही सुझाव कार्यान्वयनका लागि एन्फालाई समस्या परिरहेको छ । अलमुताईरीको विकल्प खोज्ने सन्दर्भमा एन्फाले कतारी दुतावास सहित कतार एफ एसँग कोशिश गरिरहेको छ । तर नतिजा आईसकेको छैन ।
आफु अनुकुलको नेतृत्व नआएपछि अलमुताईरी आफैले राष्ट्रिय टिमको जिम्मेवारीबाट बिदा लिनुपर्ने हो । उनलाई प्रस्ट थाहा छ, नयाँ एन्फासँग उनको जम्दैन । उनी आफै एन्फा राजनीतिमा मुछिएका व्यक्ति हुन् । एन्फामा नेतृत्व परिवर्तन भए लगत्तै नेपाल नफर्कने संकेत गरेका अलमुताईरीले अहिले पोजिसन फेरेका छन् । महासचिव किरण राईले छानविन प्रतिवेदन अनुसार अघि बढ्नुपर्ने विषयमा अलुमताईरीको ध्यानाकर्षण गराएका थिए । अलमुताईरीले आफु उपचारमा रहेको र केही समय आराम गर्ने जानकारी महासचिव राईलाई गराएका थिए । नेपाल फर्किएपछि सबै पक्ष बसेर प्रतिवेदन अनुसार विवादको समाधान खोज्ने निष्कर्श निस्किएको थियो ।
लगत्तै अलमुताईरीले आफु काम गर्न इच्छुक रहेको जानकारी गराउँदै एन्फालाई आफ्नो कार्य योजना पठाउने काम गरे । यसले विवादको समाधान भन्दा विषयलाई जटिलतातर्फ लैजाने काम गर्यो । केही समयपछि त एन्फा, खेलाडी र प्रशिक्षकबीचको विवादको निरुपण नहुँदै बंगलादेशबिरुद्ध आसन्न मैत्रीपूर्ण खेलका लागि अलमुताईरीले खेलाडीको सुचिनै पठाए । त्यसमा सहायक कोचदेखि फिजियोसम्मको नाम लिस्टमा राखेका थिए । बिना कुनै छलफल खेलाडीको सूचि पठाएपछि एन्फा आफै अन्यौलमा परेको थियो । महासचिव र अन्तराष्ट्रिय सम्बन्ध विभाग प्रमुखले मात्र चलाउने मेलको सूचना मिडियासम्मै पुगेपछि एन्फालाई तनाव थप्ने काम गर्यो ।
मुख्य प्रशिक्षक विषयको विवाद समाधान नभैकन प्रशिक्षक एकलौटी ढङ्गले अघि बढ्न खोजेपछि एन्फापनि काउन्टरमा उत्रिएको छ । उनले अलमुताईरीलाई बिदामै राख्दै कार्यवहाक प्रशिक्षकमा प्रदीप हुमागाईलाई नियुक्त गरेको छ । हुमागाईमात्र हैन, एन्फाले अलमुताईरीको कोचिङ स्टाफलाई फेर्दै सहायक प्रशिक्षकमा युगलकिशोर राई र गोलकिपर कोचमा बिनोद डंगोललाई जिम्मेवारी दिएको छ ।
एन्फाको प्रस्ट सन्देश छ, नेपाललाई अब अलमुताईरी चाहिदैन । उनी आफैले मार्ग प्रसस्त गरुन् । अलमुताईरीसँग संगै अघि बढ्न नसकिने एन्फाको सोच देखिन्छ । अलमुताईरी आफैले प्रतिवेदन अनुसार राजीनामा गरेर मार्ग प्रसस्त गरुन् भन्ने चाहना एन्फाको छ । त्यसैले अलमुताईरीलाई बाइपास गर्दै एन्फाले कार्यवहाक प्रशिक्षकदेखि नयाँ कोचिङ सेटनै तयार पारेको छ । त्यति मात्र हैन, अलमुताईरीसँग असन्तुष्ट रहेका र अपमानजनक तरिकाले बन्द प्रशिक्षणबाट निकालिएका खेलाडीलाई राष्ट्रिय टिममा फर्काउने एन्फाको निर्णय छ । यस अवस्थामा अलमुताईरी र खेलाडी, एन्फा एकै ठाउँमा रहने परिस्तिथी देखिदैन । खेलाडीहरु आफैपनि अलमुताईरीको बहिर्गमन चाहन्छन् । उनीहरुले प्रस्टसँग छानविन प्रतिवेदन अनुसार मुख्य प्रशिक्षकको विकल्प दिनुपर्ने भनाई राख्दै आएका छन् ।
तर अलमुताईरी विवादलाई अझ जटिल बनाउन खोज्दैछन् । नेपाल नफर्कने संकेत गरेका उनी निर्णयबाट पछि हट्दै राष्ट्रिय टिममा फेरी काम गर्ने ईच्छा व्यक्त गर्नुले सोही कुरा प्रस्ट गर्छ । मुख्य कुरा त्रिपक्षिय सम्झौता हुँदा एन्फाले अलमुताईरीसँग तीन वर्षको सम्झौता गरेको थियो, झण्डै मासिक १० हजार डलर दिने गरि । यदी एन्फाले अलमुताईरीलाई बर्खास्त गरेको खण्डमा बाँकी दुई वर्षको करिब साढे दुई करोड रुपैयाँको क्षतिपूर्ती दिनुपर्छ । अलमुताईरी राष्ट्रियबाट हट्नै परे क्षतिपूर्ती सहितको सोही बर्खास्ती खेजिरहेका छन् । एन्फा आफैमा आर्थिक संकटमा रहेका कारण त्यति ठुलो रकम क्षतिपूर्ती दिन सक्ने अवस्था छैन । अलमुताईरी बर्खास्ती नभई छाड्ने ‘मुड’मा छैनन् । मुख्य प्रशिक्षकको राजीनामा खोजेको एन्फा र बर्खास्ती चाहेका अलमुताईरीको यही अन्तरद्धन्दमा खेलाडी प्रशिक्षक विवादको चुरो अड्किएर बसेको छ ।
