काठमाडौं । विधान मिचेर नबिन पाँडेलाई अन्तराष्ट्रिय सम्बन्ध प्रमुखमा नियुक्त गर्ने एन्फा निर्णयको विरोध भएको छ । अखिल नेपाल फुटबल संघ एन्फाको नवनिर्वाचित कार्यसमितिको पहिलो बैठकले विधान विपरित नबिन पाँडेलाई अन्तराष्ट्रिय सम्बन्ध प्रमुखमा नियुक्त गरेको थियो ।
एन्फा विधानको धारा २४ मा गैर नेपाली नागरिकलाई एन्फा वा प्रदेश फुटबल संघ वा जिल्ला फुटबल संघमा निर्वाचित वा मनोनित हुन नसक्ने व्यवस्था गरेको छ । तर नेपाली मुलका जर्मन नागरिक पाँडेलाई एन्फाले विभागीय जिम्मेवारी सहित नियुक्त गरेर विधान विपरितको काम गरेको छ ।
पूर्व अध्यक्ष गणेश थापाले एन्फा बिधानको धारा २४ को ३ विपरित विदेशी नागरिकलाई अन्तराष्ट्रिय सम्बन्ध विभागमा गरिएको नियुक्ति गलत भएको बताए । उनले एन्फा विधानलाई प्रस्तुत गर्दै अवैधानिक रुपमा गरिएको निर्णय सच्चाउनुपर्नेमा जोड दिएका छन् ।
गणेश थापाकै सहयोगमा कर्माछिरिङ शेर्पालाई हराउँदै पंकजबिक्रम नेम्वाङ एन्फा निर्वाचनमा निर्वाचित भएका थिए । सुशासन र सामुहिक नेतृत्वको नारा सहित चुनाव लडेका नेम्वाङले पहिलो बैठकमा नै विधान विपरितको निर्णय गरेका हुन् ।
चुनावी अभियानमा पाँडे नेम्वाङको साथमा देखिएका थिए । तत्कालिन एन्फा अध्यक्ष गणेश थापादेखि कर्माछिरिङ शेर्पालाई एन्फा अध्यक्षमा पराजित गर्न पाँडेले चुनावमा ‘चलखेल’ गरेका थिए ।
‘चेन्ज एन्फा’ भन्दै फुटबल राजनीतिमा सक्रिय देखिने पाँडेले दोस्रो पटक अन्तराष्ट्रिय सम्बन्ध प्रमुखको नियुक्ति पाएका हुन् । अघिल्लो पटक थापालाई हराउन सहयोग गरेको भन्दै शेर्पाले पनि पाँडेलाई सोही नियुक्ति दिएका थिए ।
एन्फा डेलिगेट्सकै रुपमा विदेशी नागरिक पाँडेलाई फिफा बैठकमा सहभागी गराएपछि निवर्तमान अध्यक्ष शेर्पाको चर्को आलोचना भएको थियो । एन्फाका हरेक गतिविधिमा पाँडेको हस्तक्षप बढ्न थालेपछि शेर्पासँग उनको दुरी बढेको थियो ।
त्यसपछि जिम्मेवारीबाट राजीनामा दिदै उनी ‘चेन्ज शेर्पा’को नारा सहित नेम्वाङलाई अध्यक्ष बनाउने अभियानमा लागेका थिए ।
नेम्वाङलाई अध्यक्ष बनाउन सफल भएपछि एन्फाको नवनिर्वाचित नेतृत्वले उनलाई पुन अन्तराष्ट्रिय सम्बन्ध प्रमुखमा नियुक्त गरेको छ । सुचना र एजेण्डा बिनै राखिएको पहिलो बैठकबाट महत्वपुर्ण निर्णय गरेका नेम्वाङले पाँडेलाई सो जिम्मेवारीबाट पुरस्कृत गरेका हुन् ।
एन्फाको हरेक चुनावी चलखेलमा सक्रिय हुने भएकाले कुनैपनि कार्यसमिति सदस्यले विधान विपरित पाँडेलाई निुयक्त गर्ने निर्णयको विरोध गर्ने आट गरेनन् । प्राय जर्मनमै रहने तथा फुटबलमा चलखेल गर्न नेपाल आइपुग्ने पाँडेलाई अन्तराष्ट्रिय सम्बन्ध प्रमुख नियुक्ति गर्ने एन्फा निर्णयको अहिले आएर विरोध भएको छ ।
थापाको विरोधमा समर्थन जनाउँदै एन्फाका पूर्व अध्यक्ष नरेन्द्र श्रेष्ठले समेत हतारमा गलत निर्णय गर्नुभन्दा सोचेर, समय लिएर, सल्लाहमा सहि निर्णय लिनुपर्ने बताउँछन् । नेम्वाङलाई अध्यक्ष बनाउन समर्थन गरेका श्रेष्ठले गलत निर्णय सच्चाउन बुद्धिमानी हुने सुझाव दिएका छन् ।
