काठमाडौं । जिल्लाको फुटबलमा लामो समय काम गरेका पात्र हुन्, भोजराज शाही । पश्चिम नेपालको बाँके जिल्लाको फुटबलमा विगत २५ वर्षदेखि काम गर्दै आएका शाहीले यस पटक एन्फाको केन्द्रिय सदस्य बन्ने इच्छा गरेका छन् । लामो समय मोफसलको फुटबलमा सेवा गरेर बिताएका भोजराज समग्र पश्चिम क्षेत्रको फुटबलको विकासमा योगदान गर्न केन्द्रमा आउन लागेको बताउँछन् ।
नेपाली फुटबलमा पूर्वको छुट्टै प्रभाव छ । राष्ट्रिय फुटबल टिमका अधिकांश अनुहार पूर्वकै जिल्लाबाट आएका छन् । भौगोलिक हिसाबले पश्चिमको फुटबल पनि बलियो बनाउँदै राष्ट्रलाई योगदान गर्नुपर्ने धारणा राख्छन्, भोजराज ।
‘पश्चिम नेपालको फुटबलसँगै नेपाली फुटबलको व्यवस्थापन पक्ष कमजोर हुँदै गएको छ । नेतृत्व इमानदार भएर व्यवस्थापन पक्षलाई बलियो बनाउँदै फुटबलको विकासमा लाग्नु पर्नेछ ।’ उनी भन्छन् ।
फुटबल विकासमा सक्रिय भएर साढे दुई दशक बिताएका शाही पश्चिम नेपालको फुटबलले फड्को मार्ने दिन आएको बताउँछन् । पश्चिममा फुटबलको लोकप्रियता बढाउँदै फुटबलको स्तर र पुर्वाधार निर्माण गर्ने लक्ष्य आफुले लिएको उनको कथन छ ।
‘पछिल्लो समय देशले सामना गरेको कोरोना, भुकम्प जस्ता घटनापछि अब फुटबलले नयाँ गतिका साथ काम गर्नु पर्ने समय आएको छ ।’ उनले भने, ‘पछिल्ला केहि वर्ष हामी सबैका लागि त्यति सुख रहेन । तर अब समय आएको छ । विगतमा गर्न नसकेको कुरा प्राप्त गर्नको लागि तिव्र गतिमा फुटबल विकासको गतिलाई पछ्याउनु पर्नेछ । स्रोत, साधन र प्राविधिक पक्षमा पनि सुधार गर्न जरुरी छ ।’
बाँके जिल्लामा नेपालगन्ज गोल्ड कप, ग्रास रुट कार्यक्रम र पुर्वाधार विकास क्षेत्रमा शाहीले नेतृत्वदायी भुमिका खेलेका छन् । २५ वर्षदेखि उनले बाँके जिल्ला फुटबल संघको विभिन्न पदमा बसेर फुटबल विकासमा योगदान गरेका छन् । शाही अध्यक्ष रहेको ओशोनिक क्लब बाँकेमा प्रतिभावान महिला खेलाडी उत्पादन गर्ने क्लबका रुपमा चिनिन्छ । जसले उत्पादन गरेका खेलाडीहरुले नेपाली महिला फुटबल टिमबाट खेलिसकेका छन् ।
‘पश्चिम क्षेत्रमा फुटबलको राम्रो सम्भावना भएपनि त्यसलाई सदुपयोग गर्न सकिएन ।’ उनले भने, ‘हामी सबै कुरामा निपुर्ण छैनौं । फुटबलको वातावरण निर्माणका लागि जनतामा फुटबलको बारेमा सकारात्मक कुरा बुझाउन जरुरी छ । अर्को कुरा पश्चिम क्षेत्रमा हामीले सोचे जस्तो फुटबलको विकास गर्न सकेका छैनौं । थुपै्र समस्याको हामीले सामना गरिरहेका छौं । अब सबै चुनौतिलाई पन्छाउँदै अरुको अनुभव र आफनो योजना सहित काम गर्ने लक्ष्य छ ।’
