काठमाडौं । गत बिहीबार एन्फा अध्यक्ष कर्माछिरिङ शेर्पा र वरिष्ठ उपाध्यक्ष पंकजबिक्रम नेम्वाङ्गको अंकमाल सहित ‘बिस्फोटक’ हाँसोको तस्विर बाहिर आयो । एन्फा कार्यसमितिको अन्तिम बैठक सम्पन्न गरेसँगै आएको तस्विरमा दुवै जना धेरैपछि खुलेर हाँसेको देखिन्थ्यो ।
करिब चार वर्षअघि एउटै नारा र प्यानल सहित एन्फा छिरेका दुवै जना सँगै रहन भने सकेनन् । तत्कालिन एन्फा अध्यक्ष गणेश थापालाई फुटबलको सत्ताबाट बाहिर पठाउन एकजुट भएर आन्दोलन गरेका दुवै जना फुटबलको सत्ता साझेदारीमा भने असफल रहे ।
मुल नेतृत्वको हिसाबले कर्माछिरिङ एन्फाको संस्थापन बनेका छन्, पंकज प्रतिपक्षको कित्तामा पुगेका छन् । सत्तामा साझेदारी भएन भने नेता स्वभाविक रुपमा प्रतिपक्षको बेन्चमा पुग्छ । एन्फाभित्र पंकजको पोजिसन र अवस्था भनेको वरिष्ठ उपाध्यक्ष भन्दा प्रतिपक्ष नेताको बनेको छ ।
कर्मा–पंकजको अन्तरङ्ग सम्बन्धका कथा, अविश्वास, धोकाका पटकथा लेखिनेनै छ, तर बिहीबारको तस्विरले कर्मा–पंकजको उही पुरानो दोस्तीको सम्झना भने गरायो । तस्विर भन्दा ठिक फरक दृष्य एन्फाको अन्तिम बैठकमा पनि देखिएको थियो ।
सबैलाई थाहा छ, पछिल्ला तीन वर्षयता कर्मा–पंकजको अन्तरसंघर्ष उत्कर्षमा छ । एन्फाका हरेक बैठकमा पंकज प्रतिपक्षको भूमिकामा देखिने गर्छन् । बिहीबारको कार्यसमिति बैठक आसन्न निर्वाचनको एजेण्डामा केन्द्रित थियो । सबै एजेण्डा निर्वाचन केन्द्रित थिए । स्मरण रहोस, एन्फाको नयाँ नेतृत्वको निर्वाचन जेठ १५ गते हुदैछ । बैठकमा निर्वाचन नियमावलीको मस्यौदा, निर्वाचन समिति गठन, निर्वाचन पुनरावेदन समिति गठन लगायतका एजेण्डा थिए ।
अन्य बैठक जस्तो बिहीबारको बैठकका एजेण्डामाथिको छलफलमा पंकजले खासै विरोध गरेनन् । निर्वाचन नियमावलीको मस्यौदा किरण राईको संयोजकत्वमा बनेको थियो । जसलाई बैठकले सर्वसम्मत रुपमा पारित गर्यो ।
बैठकले निर्वाचन समिति गठन गर्यो । जसमा पंकजले पनि केही नाम सिफारिस गरे, सोही अनुसार निर्वाचन समिति गठन भयो । अध्यक्ष शेर्पाले निर्वाचन पुनरावेदन समिति गठनको प्रस्ताव गरेका थिए, त्यसमा समेत दुवै पक्षले आफु अनुकुलका नाम प्रस्ताव गरे र समिति गठन भयो ।
बैठकको धारणा राख्ने क्रममा पंकजले एन्फाको वर्तमान नेतृत्वको कार्यशैलीमाथि विरोध गर्न भने छुटाएनन् । उनले कार्यसमितिमा एउटा निर्णय हुने, माईन्युट हुदाँ थप÷घट भएका आउने, एन्फामा संस्थागत निर्णय र छलफलनै नहुने लगायतका गुनासो गरेका थिए । जुन कुरा पंकजले एन्फाका प्राय कार्यसमिति बैठकमा राख्दै आएका छन् ।
सबैभन्दा घोचक बिषय, ह्वाई टिकट र पेस्की रकम सम्बन्धि छानविन गर्न गठित समितिको प्रतिवेदन कार्यसमिति बैठकमा प्रस्तुत गर्न माग पंकज पक्षले गर्यो । कार्यसमिति बैठकले गठन गरेको समिति भएकाले बैठकमा रिपोर्ट प्रस्तुत हुनुपर्ने माग सो पक्षले गरेको थियो । निकै जोडबल पछि सो रिपोर्ट उपाध्यक्ष खड्काले बैठकमा प्रस्तुत गरे । रिपोर्टमा संयोजक खड्काले एन्फा अध्यक्ष शेर्पा, महासचिव इन्द्रमान तुलाधरलेनै छानविनमा असहयोग गरेको गम्भिर आरोप लगाए । तर बैठकले प्रक्रिया अनुसारनै रिपोर्ट कार्यान्वयन अघि बढ्ने बताउँदै कुनै ठोस निर्णय भने गरेन ।
बैठक सकेर सबै जना अध्यक्ष शेर्पाको कार्यकक्षमा जम्मा भएका थिए । दुवै पक्षका नेताबीच हाँसी मजाक चल्दै थियो ।
चार वर्षअघि एउटै प्यानलबाट चुनाव लडेर एन्फा पुगेका अधिकांश पदाधिकारी र सदस्यले आसन्न चुनावमा समेत मिलेर अघि बढ्नुपर्ने सुझाए । उपस्थित सदस्यहरुले कार्यसमितिको अन्तिम बैठक सम्पन्न गरेकाले कर्मा–पंकजलाई संयुक्त तस्विर लिन अनुरोध गरे । सदस्यहरुकै जोडबलमा दुवै जना मोबाईल क्यामराको एउटै फ्रेममा बाँधिए । केहीले हाँस्न भने, केहीले अंकमाल गर्न उस्काए । एक समय फुटबलको नेतृत्व परिवर्तनको आन्दोलनमा एकसाथ लडेका दुवै जनाले शुभेच्छुक पदाधिकारी, सदस्यका अघि निष्फिक्री हाँसोको ‘पोज’ दिए ।
के त्यसो भए दुवै जना पुरानो दोस्ती, दुस्मनी बिर्सिएर नयाँ सिराबाट सम्बन्धको सुरुवात गर्न लागेका हुन् त ?
दुवै पक्षका नजिकका नेता भन्छन्, हैन ।
दुवै नेता सहमतीको मिलन बिन्दुबाट निकै अघि बढिसकेका छन् । एक अर्थमा कर्मा–पंकजले ‘कित्ता क्लियर’ गरिसकेका छन् । दुई नेताको सहकार्य अब उनीहरुको हातमा पनि छैन । दुवै पक्षले एन्फाभित्र पछिल्ला तीन वर्ष दुई लाईनको संघर्ष गरिरहेका छन् । दुवै पक्षका आफ्ना समुह छन्, संघर्ष छन् ।
बिहीबार सार्वजनीक तस्विरलाई पंकज निकटका नेता दावा लामाले फेसबुकमा पोस्ट गर्दै लेखेका छन्, ‘आगामी निर्वाचनमा एन्फा अध्यक्ष कर्माछिरिङ शेर्पा र वरिष्ठ उपाध्यक्ष नेम्वाङ बीच स्वच्छ प्रतिस्पर्धा हुने देखियो ।’
शनिबार बिहानै पंकजले समेत तस्विकले भ्रम सिर्जना गराउन खोजिएको आरोप सहित आफ्नो फुटबलको शुद्धिकरण अभियान जारी रहेको बताएका छन् । उनले वर्तमान नेतृत्वसँग आफ्नो कुनै प्रकारको सम्झौता र सहमती नभएको र ‘नहुने’ पनि स्पष्ट पारेका छन् ।
अझ स्पष्ट रुपमा भन्नुपर्दा कर्माछिरिङ फुटबलको सत्तामा पुन एक पटक दोहरिन चाहन्छन् । अघिल्लो पटकको निर्वाचनमा ‘क्लिनसिप’ गर्दै उनी फुटबलको नयाँ शक्तिको रुपमा उदाएका थिए । पंकज भने कर्मालाई हराउँदै फुटबलको सत्तामा आफु ‘बिराजमान’ हुने दाउमा छन् । कर्मा संस्थापन भैहाले, पंजकसँग नदेखिएका सबै नेता आफुसँग रहेको भन्दै ढुक्क छन् । पंकज भने कर्मासँग असन्तुष्ट समुह र नेतालाई आफुतर्फ आकर्षित गर्न जोडबल गरिरहेका छन् ।
अन्तिम कार्यसमितिको बैठक सम्पन्न भएसँगै फुटबल संघको आसन्न चुनावी सरगर्मी सुरु भएको छ । खेलकुदमा फुटबलको सत्ता र प्रभाव बेग्लै छ । जो कोही यो सत्तामा पुग्न चाहन्छन् । जेठ १५ को ‘ब्याटल’का लागि कर्मा र पंकज तयार भएका छन् ।
-1751297393.jpeg)
-1751282483.jpeg)
-1751282194.jpeg)
