अभिषेक रिजाल

नाम : अभिषेक रिजाल

जन्ममिति : २०५६–१०–१६

जन्म स्थान : काठमाडौं , वाफल

शिक्षा : १२ पास

हाइट  :  ५.७ इन्च

तौल   : ६७ किलो

बुबा : हिम रिजाल

आमा : अर्पणा रिजाल

सानो गौचरणको बालुवाले भरिएको मैदानबाट फुटबल करियर सुरुवात गरेका थिए, अभिषेक रिजालले । अहिले उनी इन्डोनेसियामा हुने १८ औँ एसियन गेमको तयारीमा जुटेका छन् ।

गोलको खडेरी । नेपाली फुटबलको बल्झिने रोग हो । अन्तराष्ट्रिय फुटबलमा त यो अझ चर्को छ । त्यही गोलको खडेरी एसियन गेम्समा तोड्ने अभिषेकको लक्ष्य छ ।

विश्व फुटबलका उनी सुपरस्टार क्रिस्टियानो रोनाल्डोका जवर्जस्त प्रशंसक हुन् । रोनाल्डोनै शैली पछ्याउछन्, अनि त्यही शैली अपनाउछन् ।

भनिहालौ, अभिषेकको जर्सीको प्रिय नम्बर ‘सेभेन’ हो । क्लब होस वा राष्ट्रिय टिम, उनी सेभेन नम्बरको जर्सी लगाउन खोज्छन् । उनले गोलगरेपछि रोनाल्डोकै शैलीको सेलिब्रेसन देख्न पाईन्छ । विभागीय टिम पुलिसमा प्रवेश गर्दा धेरै सिनियरले उनलाई रोनाल्डोकै उपनाम दिएका थिए ।

११ बर्षको उमेरमा उनले फुटबल करियरको सुरुवात गरे । एक बर्ष सानो गौचरणमा बल हान्न सिके, बुटमा दौडन जान्ने भए । लगत्तै उनी एन्फा एकेडेमीमा पुगे । ‘एन्फामा आउदाँ म जम्मा १२ बर्षको थिए ।’ अभिषेक आफ्नो बाल्यकाल सम्झिन्छन्, ‘त्यसपछि त हो, मैले घर छोडेर एन्फामा बसाई सरेको ।’

एन्फामा उनले लगभर ४ बर्ष बिताए । आफ्नो खेल कौशल निखार्ने मौका पाए । आफुलाई धारिलो बनाए ।

 अभिषेकले १६ बर्ष टेकेका मात्र थिए, एन्फाले एउटा निर्णय ग¥यो । एन्फा उपाध्यक्ष तथा रुस्लान थ्रीस्टार क्लबका तत्कालिन अध्यक्ष ललित श्रेष्ठको स्मृतिमा एउटा उमेर समुहको प्रतियोगिताको आयोजना गर्ने । जसको नाम राखियो, ललित स्मृति अन्डर १८ फुटबल च्याम्पियनसिप ।

प्रतियोगितामा एन्फाले आफ्ना युवा खेलाडीलाई गोलाप्रथाबाट रिलिज गर्छ । भाग्य भनौ वा दैवको देन, उनी आर्मीको भागमा परे । उनले त्यहाँ कप्तानी समाल्ने मौका पाए । पुरै प्रतियोगिताभर अभिषेक छाए । आफुलाई अब्बल सावित गर्दै दुई गोल गरेका उनले आफ्नो कप्तानीमा आर्मीलाई प्रतियोगिताको उपाधिनै जिताउन सफल भए ।

त्यसपछि उनको करियरको ग्राफ वेगले अगाडी बढ्यो । अझ भनौ उनले अहिलेसम्म पछाडी फर्किएर हेर्न परेको छैन् ।

आर्मीको जर्सीमा झापा गोल्डकप सुरु गरेका उनले पहिलो प्रतियोगितामै उपाधि जित्न सफल भए । त्यहाँ उनले आफुलाई पहिलो पटक ललित स्मृति फुटबलमा कोचिङ गराउने सिनियर टिमका कप्तान भरत खवास र विकेश कुथुसँग खेल्ने मौका पाएका थिए ।

आर्मीको सिनियर टिममा पाएको मौका उनी के छोड्थे र ? आफ्नो खेल देखाए र सिनियर टिममा आफ्नो स्थान पक्का गरे । आर्मीकै जर्सीमा उनले मोफसलको चर्चित प्रतियोगिता आहा रारा गोल्डकप खेल्न भ्याए ।

उनले २०६४ सालमा बी डीभिजनमा ब्वाईज युनियनको टिमबाट खेले । तर क्लबलाई माथि उकाल्न उनी असमर्थ भए । लगत्तै अभिषेकको माग नेपाली फुटबलमा बढ्न थाल्यो ।

विभागीय टिम पुस्ता हस्तान्तरणको चरणमा थियो । पुराना खेलाडीको खस्किएको फर्मले चिन्तित पुलिसले नयाँ युवा खेलाडीलाई खोजिरहेको थियो । त्यही समय पुलिसका सहायक प्रशिक्षक अनन्त राज थापाको आखाँमा परे, अभिषेक । उनले तत्काल अभिषेकलाई पुलिसमा ल्याए । प्रहरीको भरपर्दो खेलाडीको रुपमा विकास गराए । 

‘करीब २ वर्ष भयो पुलिसमा आएको । म यहाँ खुसी छुु’ । उनी भन्छन् ।

पुलिसको जर्सीमा अभिषेकले बुढासुब्बा गोल्डकप उपाधि उचालेको थिए । कप्तानमा थिए, जुमानु राई ।

त्यसपछिको अभिषेकले ललित स्मृतिको दोस्रो संस्करण पुलिसबाट खेले । तर टिमको यात्रा क्वार्टरफाईनलमा सकियो ।

सन् २०१७ मा अभिषेक सम्मिलित नेपाली युवा टोलीले भुटानमा भएको अन्डर १८ साफ च्याम्पियन्ससिपको उपाधिनै उचाल्यो । फाइनलमा सिकार भयो चिरपरिचित भारत । फाईनलमा नेपालले २–० को जित निकालेको थियो ।

त्यस प्रतियोगितामा अभिषेकले मात्र एक गोल गरे, त्योपनि महत्वपुर्ण मानिएको सेमिफाईनलमा । बंगलादेशविरुद्धको सो खेलमा सुरुवाती २२ मिनेटमा गोल गर्दैै उनले नेपाललाई अग्रता दिलाएका थिए । अन्तिममा नेपालले सो खेल २–१ ले जित्यो ।

अभिषेक अहिलेपनि मान्छन्, उनले जितेको अहिलेसम्मकै ठुलो उपाधि त्यही हो ।

उनले गत बर्षमात्र एएफसी यु १९ च्याम्पियनसिप क्वालिफायरमा भाग लिए, सो प्रतियोगितामा नेपाल समुह चरणबाटै बाहिरिएको थियो ।

नेपाली फुटबलमा युवा स्टार अभिषेकले नेपाली फुटबलका ठुला क्लबहरु मनाङ मस्र्याङ्दी, संकटा, आर्मी, ब्वाईज युनियन, एनआरटीसाथै मोफसलका थुप्रै क्लबबाट खेलिसकेका छन् ।

तर, उनी अहिले पुलिसका भरपर्दा खेलाडी हुन् । विगत दुई बर्षदेखि उनी पुलिसकै जर्सीमा प्रतिबद्ध देखिएका छन् ।

उनी लगायतका युवा खेलाडीको आगमनसंगै पुलिस उपाधि यात्रामा फर्किएको छ ।

२०७४ मा आहा रारा गोल्डकप र राखेप च्याम्पियनसिपमा पुलिसलाई उपाधि दिलाएका उनले पछिल्लो समय दमक गोल्डकप र नुवाकोट गोल्डकपको उपाधि पुलिसलाई जिताएका थिए ।

एसियन गेमको तयारीमा रहेका अभिषेक भन्छन्, ‘एसियन गेममा एसियन पावर हाउससंग खेल्नुपर्छ । हामी नेपाललाई जिताउन सक्दो कोशिश गर्नेछौ । तयारी राम्रो भैईरहेको छ । मेहनत गरीरहेको छु  ।’

अभिषेकको अब एउटै लक्ष्य छ  राष्ट्रिय टिमबाट खेल्ने अनि देशको नाम उचो राख्ने ।

अनि विश्वास छ, उनी यस लक्ष्यमा सफल हुनेछन् ।

 

तस्विर : अभिषेकको फेसबुक