चेन्नईको कप्तानी ऋतुराजले गर्ने

काठमाडौँ। इन्डियन प्रिमियर लिग (आईपीएल)मा चेन्नई सुपर किंग्सको कप्तानी ऋतुराज गायकवाडले गर्ने भएका छन्। चेन्नईले बिहीबार गायकवाडलाई कप्तानमा नियुक्त गरेको हो।

सन् २००८ मा शुरू भएको आईपीएलको पहिलो संस्करणदेखि नै महेन्द्रसिंह धोनीले चेन्नईको कप्तानी सम्हाल्दै आएका थिए।

उनले ५ पटक टोलीलाई विजेता बनाएका छन्। उनको कप्तानीमा चेन्नाईले सन् २०१०, २०११, २०१८, २०२१ र २०२३ मा उपाधि जितेको थियो। त्यति नै पटक चेन्नई उपविजेता बनिसकेको छ। 

यसअघि धोनीले २०२२ मा पनि चेन्नईको कप्तानी छोडेका थिए। त्यसपछि रविन्द्र जडेजालाई कप्तान बनाइएको थियो। त्यतिबेला टोलीको प्रदर्शन राम्रो नभएपछि सिजनको मध्यमा धोनीलाई पुन: कप्तानी जिम्मेवारी दिइएको थियो। 

गायकवाडले चीनमा भएको एशियाली खेलकुदमा भारतीय टोलीको कप्तानी गरेका थिए। उक्त प्रतियोगितामा उनले भारतीय टोलीलाई स्वर्ण पदक दिलाएका थिए।