काठमाडौं। पहिले अमेरिकासँग सुपर ओभरमा पाँच रनले हारेको पाकिस्तान भारतसँग ६ रनले पराजित भएको छ।
लगातार दुई हारसँगै पाकिस्तानको टी–२० विश्वकपको अर्को चरणमा पुग्ने आशा लगभग समाप्त भएको छ। टोलीको बाँकी आशा अब आयरल्यान्ड र भारतमा निर्भर छ। यदि यी दुई टोलीले अमेरिकाविरुद्ध जित हात पार्यो भने मात्र बाबर आजमको टिम प्रतियोगितामा टिकिरहन सक्नेछ।
समूह 'ए' को तालिकामा भारत पहिलो स्थानमा छ भने अमेरिका दोस्रो स्थानमा। दुवैको ४–४ अंक छ। यस्तै, पाकिस्तान र आयरल्यान्डले दुई खेलबाट अंक जोड्न सकेको छैन। पाकिस्तान चौथो र आयरल्यान्ड पाँचौं स्थानमा छ। समूहका शीर्ष दुई टोली अर्को चरण अर्थात् सुपर–८ मा प्रवेश गर्नेछन्। पाकिस्तान शीर्ष दुई स्थानका लागि संघर्षमा छ।
के पाकिस्तान अझै सुपर–८ मा पुग्न सक्छ ? सरल जवाफ हो सक्छ। तर, पाकिस्तानका लागि यो काम गर्न निकै कठिन छ। हालको अवस्थामा सुपर-८ मा पुग्न यो समीकरण पूरा हुनुपर्छ।
पाकिस्तानले समूह चरणका बाँकी दुई खेल जित्नैपर्छ:
पाकिस्तानले समूह चरणमा अझै दुई खेल खेल्न बाँकी छ। जुन ११ मा क्यानडा र जुन १६ मा आयरल्यान्डसँग। पाकिस्तानले कुनै पनि हालतमा यी दुवै खेल जित्नैपर्ने हुन्छ। जितहासिल गरे पनि छनोटको कुनै ग्यारेन्टी छैन। यदि पाकिस्तानले बाँकी दुईमध्ये एक खेल हारयो भने निश्चित रुपमा आउट हुनेछ।
अमेरिकाले पछिल्ला दुई खेलमा हार बेहोर्नु पर्छ :
अमेरिकाले अब जुन १२ मा भारतसँग र जुन १४ मा आयरल्यान्डसँग खेल्नेछ। अमेरिकाले दुवै खेल हारेमा पाकिस्तानको सुपर–८ मा पुग्ने आशा जीवितै रहनेछ।
नेट रनरेटमा पाकिस्तान अमेरिकाभन्दा अगाडि :
यदि पाकिस्तानको भाग्य धेरै राम्रो छ र माथिका दुवै शर्तहरु पूरा भएका छन् भने पनि उसले नेट रनरेटलाई राम्रो राख्नुपर्नेछ। पाकिस्तानको रनरेट माइनस ०.१५ र अमेरिकाको रनरेट प्लस ०.६३ रहेको छ। यस्तो अवस्थामा पाकिस्तानले आफ्ना दुवै खेल ठूलो अन्तरले जित्नु पर्नेछ, त्यसपछि मात्र उसले क्वालिफाई गर्न सक्नेछ।
आयरल्यान्डले गत महिना पाकिस्तानलाई पाँच विकेटले पराजित गर्दै तीन खेलको टी–२० सिरिज जितेको थियो। आयरल्यान्डले सन् २००७ को एकदिवसीय विश्वकपमा पनि पाकिस्तानलाई हराएको थियो। गत टी–२० विश्वकपमा समूह चरणमा च्याम्पियन इंग्ल्यान्डलाई आयरल्यान्डले पराजित गरेको थियो।
आयरल्यान्डले टी–२० विश्वकपमा इंग्ल्यान्डसँगै वेस्ट इन्डिज, बंगलादेश र जिम्बाब्वेजस्ता शीर्ष टोलीलाई पराजित गरेको थियो। अर्कोतर्फ पाकिस्तान टी–२० विश्वकपमा जिम्बाब्वे र अमेरिकाजस्ता साना टोलीसँग पराजित भएको छ। अर्थात् पाकिस्तानको टोलीले आयरल्यान्डलाई हलुका रुपमा लिन मिल्दैन।