काठमाडौं । कतारमा जारी रहेको लिजेन्डस् क्रिकेट लिगमा फाईनल प्रवेशका लागि नेपाली राष्ट्रिय क्रिकेट टोलीका पूर्व कप्तान पारस खड्का आबद्ध एसीयन लायन्सले ईण्डियन महाराजलाई जितका लागि १ सय ९२ रनको लक्ष्य दिएको छ।
कतारको दोहा स्थित वेस्ट इन्ड पार्क क्रिकेट मैदानमा टस जितेर लायन्सले पहिले ब्याटिङ रोजेको थियो ।
लायन्सले २० ओभरमा ५ विकेट गुमाएर १ सय ९१ रन बनाएको हो ।
लायन्सका लागि ओपनर उपुल थरंगाले ३२ बलमा ५० रनको अर्धशतकीय ईनिङ खेले । मोहम्मद हाफिजले ३८ तथा अस्गर अफगानले अविजित ३३ रन बनाए ।
महाराजका लागि स्टुअर्ड बिन्नी र प्रज्ञान ओझाले समान २/२ तथा प्रविन ताम्बेले १ विकेट लिए ।
आजको खेलको विजेताले फाइनलमा स्थान बनाउने छ । वल्र्ड जायन्ट्स समूह चरणको शीर्ष स्थानमा रहँदै फाईनल प्रवेश गरिसकेको छ ।
समूह चरणको दुई खेलमा लायन्स र महाराजबीचको खेलमा १ खेलमा लायन्स तथा १ खेलमा महाराज बिजयी भएका थिए ।
समूह चरणको अन्तिम खेलमा नेपाली राष्ट्रिय क्रिकेट टोलीका पूर्व कप्तान पारस खड्काले प्लेईङ-११ मा मौका पाएका थिए । वल्र्ड जायन्टविरुद्धको खेलमा आठौं नम्बरमा ब्याटिङको मौका पाएका पारसले १० बलमा ८ रन बनाए ।
समूह चरणको चार मध्ये दुई खेल जितेको एसिया लायन्स अंक तालिकाको दोस्रो स्थानमा र ईण्डियन महाराज १ खेलमा जित हात पारेर तालिकाको पुछारमा रहेका थिए ।
दोस्रो र तेस्रो स्थानमा रहेका टोलीहरु मध्ये एकले फाइनल स्थान बनाउँने छन् । फाइनल खेल आगामी सोमबार रहेको छ ।
