काठमाडौं। सप्तरीको राजविराजमा जारि चौंथो संस्करणको मिथिला कप टि-२० क्रिकेट प्रतियोगिता अन्तर्गत आठौँ दिन सम्पन्न खेलमा एसके स्पोर्ट्स एकेडेमी सप्तरीले जुटेपानि युवा क्लब सर्लाहीलाई १० विकेटले पराजित गरेको छ।
बिस्नुपुर स्थित महेन्द्र विन्देश्वरी मल्टिपल कलेज टियु मैदानमा जुटेपानि युवा क्लब सर्लाहीले दिएको १०९ रनको लक्ष्य एसके स्पोर्ट्स एकेडेमी सप्तरीले विकेट नगुमाई १४ ओभरमै पूरा गर्यो ।
एसके स्पोर्ट्सको लागि राष्ट्रिय क्रिकेटर समेत रहेका सुनिल धमलाले अर्धशतकीय योगदान दिए। उनले अविजित ५८ रन बनाए जुन क्रममा ३८ बलमा ६ चौका र २ छक्का प्रहार गरे। अर्का ओपनर भोला भण्डारीले ४६ बलमा ३ चौका र १ छक्का मद्दतले ४५ रन बनाए।
यस अघि टस जितेर ब्याटिङ गरेको जुटेपानिले १८.२ ओभरमा १०८ रनमा सबै विकेट गुमायो। उसको लागि सुधिर चौधरीले सर्वाधिक ३८, बिबेक चौधरीले २८ तथा विशाल पटेलले १९ रन बनाए।
सुनसरीको बलिङमा राष्ट्रिय क्रिकेट टिमको प्रतिनिधित्व गरिसकेका फास्ट बलर रासिद खानले ह्याट्रिक सहित ५ विकेट लिए। उनले ३.२ ओभरमा १ मेडन ओभर गर्दै १० रन खर्चिए।
इनिङको अठारौं ओभरको दोश्रो, तेश्रो र चौंथो बलमा क्रमशः विशाल पटेललाई क्याच आउट, सक्रिय कार्कीलाई बोल्ड र अभय यादवलाई एलबिडब्लु पार्दै उनले ह्याट्रिक पुरा गरे।
संजित साह र अजय यादवले २/२ तथा सुनिल धमलाले १ विकेट लिए। ह्याट्रिक विकेट लिएका रासिद खान प्लेयर अफ द म्याच घोषित भए।
प्रतियोगिता अन्तर्गत आइतबार एईसीए रौतहट र जेसीए धनुषा प्रतिस्पर्धा गर्नेछन्। बजाज युथ एकेडेमी, सप्तरी र कलैया क्रिकेट क्लबले प्रतियोगिताको सेमीफाइनलमा स्थान पक्का गरिसकेका छन्।
युवा शक्ति क्लबद्वारा आयोजित नक-आउट प्रतियोगितामा १६ टोलि सहभागी छन्। प्रतियोगिताको विजेताले एक लाख रुपैयाँ प्राप्त गर्नेछ।
