काठमाडौं । दावाँली मिलन क्लब काठमाडौंले बंगलादेशमा आयोजना भएको सीएभीए बिच भलिबल प्रतियोगितामा उपविजेता बनेको नेपाली टोलीलाई सम्मान गरेको छ ।
दावाँली मिलन क्लबले शनिबार रजत पदक विजेता नेपाली महिला तथा पुरुष बिच भलिबल टोलीका खेलाडी, प्रशिक्षक र टिम व्यवस्थापकलाई नगदसहित सम्मान गरेको हो ।
कुपन्डोलस्थित म्याक्सिम ब्याक्वेटमा क्लबले १७ औं वार्षिक साधारणसभाको अवसरमा बिच भलिबल टोलीलाई नगद ५ हजारसहित सम्मानपत्रद्वारा सम्मान गरेको हो ।
बंगलादेशको कक्स बजारमा गत पुषमा भएको प्रतियोगितामा नेपालको महिला र पुरुष टिमले रजत पदक जितेको थियो ।
सम्मानित हुने पुरुष खेलाडीमा मान बहादुर श्रेष्ठ र दिल बहादुर सुनार तथा महिलातर्फ कोपिला उप्रेती र कमला पुन रहेका छन् । टिमको मुख्य प्रशिक्षक भरत शाह र टिम म्यानेजर जुनु पुन समेत सम्मानित भए ।
यस्तै एनएसजेएफ बजाज पल्सर स्पोर्ट्स अवार्ड २०७८ को वर्ष महिला खेलाडी घोषित भलिबल कप्तान अरुणा शाही र अवार्ड अन्तर्गत पिपल्स च्वाइस अवार्ड विजेता उषा भण्डारी समेत नगदसहित सम्मानित भए ।
कार्यक्रममा प्रमुख अतिथि संस्कृति, पर्यटन तथा नागरिक उड्डयन मन्त्री सुदन किराँती, दावाँली मिलन क्लबका अध्यक्ष रोशन श्रेष्ठ, बागमती प्रदेशका संस्कृति तथा पर्यटनमन्त्री दीपेन्द्र श्रेष्ठ, प्रदेशसभा सदस्य बुद्धिकुमार राजभण्डारी, नेपाल भलिबल संघका अध्यक्ष जितेन्द्र बहादुर चन्द, पूर्व भलिबल खेलाडी तथा सशस्त्र प्रहरीको पूर्व महानिरीक्षक दुर्जु कुमार राई लगायतले खेलाडीलाई सम्मानित गरे ।
यस्तै कार्यक्रममा भोजपुरमा एम्वुलेन्स सेवा संचालनमा अमुल्य योगदान गर्ने व्यक्तित्वहरुहरुलाई कदर पत्र प्रदान गरिएको थियो । यस्तै क्लबले आजीवन सदस्यहरुलाई प्रमाणपत्र प्रदान गरेको थियो ।
कार्यक्रममा बोल्दै मन्त्री किराँतीले क्लबलाई अझै प्रगतिको लागि शुभकामना व्यक्त गरे ।
कार्यक्रममा क्लबको वार्षिक प्रतिवेदन र आर्थिक प्रतिवेदन प्रस्तुत गरिएको थियो ।
1680159079.JPG)
