काठमाडौं । गण्डकी विश्वविद्यालयले पोखरा रंगशालामा कुलपति रनिङ शिल्ड फुटबल प्रतियोगिता आयोजना गर्ने भएको छ । पोखरामा आईतबार पत्रकार सम्मेलनको आयोजना गरेर विश्वविद्यालयले प्रतियोगिता आयोजनाबारे जानकारी गराएको हो । पहिलो पटक आयोजना हुन लागेको प्रतियोगिता माघ ९ गतेदेखि १३ गतेसम्म पोखरा रंगशालामा सञ्चालन हुने बताईएको छ ।
समग्र खेलकुदको विकास, सम्बद्र्धन, प्रबद्र्धन र खेलकुदप्रतिको आकर्षण अभिवृद्धि गर्न योगदान पुर्याउने उद्धेश्यले प्रतियोगिता आयोजना गर्न लागिएको पत्रकार सम्मेलनमा जानकारी गराईएको छ ।
प्रतियोगितामा कास्कीबाट ६ टिम र बाहिर जिल्लाबाट ३ टिम सहभागी हुनेछन् । अन्य जिल्लाबाट कोटा पुरा नभएको अवस्थामा कास्कीका इच्छुक विद्यालय सहभागी गराउने प्रावधान अनुसार प्रतियोगितामा १२ वटा विद्यालयले सहभागी जनाउने पक्का भएको छ । नकआउट आधारमा सञ्चालन हुने प्रतियोगिताको फाइनल खेल माघ १३ गते हुने जानकारी दिईएको छ ।
पहिलो र फाइनल खेल पोखरा रंगशाला मैदानमा हुनेछ भने बाँकी खेल रंगशाला बाहिरको मैदानमा सञ्चालन गरिनेछ । प्रतियोगिताको विजेताले १ लाख र उपविजेताले ५० हजार रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीलाई १५ हजार रुपैयाँ प्रदान गरिने बताईएको छ ।
खेलकुद क्षेत्रसँग सम्बन्धित उच्चस्तरीय जनशक्ति उत्पादन गर्ने उद्धेश्यले सञ्चालित स्नातक तहको डिग्री कार्यक्रमको समग्र विकास र उत्थानमा समेत टेवा पुर्याउने उद्धेश्यले प्रतियोगिता सञ्चालन गर्न लागिएको प्रतियोगिताका संयोजक डा. मधुसुधन सुवेदीले बताएका छन् ।
नेपालमा पहिलो पटक प्रदेश सरकारद्धारा स्थापित गण्डकी विश्व विद्यालयले स्नातक तहमा खेलकुद व्यवस्थापन विषयको पठन पाठन सुरु गर्ने एकमात्र विश्वविद्यालयको रुपमा परिचय बनाएको छ ।
