काठमाडौ । युनाइटेड अरब इमिरेट्स चेस महासंघको आयोजनामा भाद्र ११ गते देखि १७ गते सम्म युएईको दुबईमा हुन गैईरहेको एसियन एमेच्योर चेस प्रतियोगितामा सहभागिता जनाउने नेपाली खेलाडीहरु आईतबार त्यसतर्फ प्रस्थान गर्ने भएका छन् ।
प्रतियोगिताका लागि २०८० असार ९ गते देखि १३ सम्म धनगढीमा भएको पाचौं राष्ट्रिय एमेच्योर खुला तर्फका विजेता दोलखाका आशिष फुयाल र महिला तर्फ विजेता कैलाली की कुसुम पाण्डे रहेका छन् ।
अन्य खेलाडीमा धन बहादुर बोगटी, भिमदत्त पाण्डेय, राजिव कार्की, जित बहादुर, गोविन्दमान श्रेष्ठ र भोजराज चौलागाई रहेका छन् ।
आषिश फुयाल २ हजार रेटेड तर्फ प्रतिस्पर्धा गर्नेछन् । अन्य सबै खेलाडीहरुले १७ सय मुनिको रेटिङमा प्रतिस्पर्धा गर्नेछन् ।
दुवई प्रस्थान गर्ने खेलाडीहरुलाई राष्ट्रिय खेलकुद परिषदका सदस्य सचिव टंकलाल घिसिङले प्रतियोगितामा सफलताको शुभकामना सहित विदाई गरेका थिए ।
नेपाल बुद्धिचाल महासंघका अध्यक्ष विदुर प्रसाद गौतमको अध्यक्षतामा भएको विदाई समारोहमा संघका पदाधिकारीहरुको उपस्थिति रहेको थियो ।
