काठमाडौं । यस सिजनको मध्यान्नमै शीर्ष स्थानमा रहदै मछिन्द्रले एएफसी कप छनोटका लागि टिकट पक्का गरेको थियो । एएफसी कप छनोट खेल्ने पक्का गरिसकेपछि मछिन्द्रका लागि लिगको उपाधि यात्रा खासै कठिन भने रहेन । मछिन्द्र अपराजित रहदै लगातार दोस्रो पटक लिग उपाधि रक्षा गर्न सफल रह्यो ।
एएफसी कप छनोटमा चिरप्रतिद्धन्दी क्लब मनाङ मर्स्याङ्दी क्लबसँग प्रतिस्पर्धा गरेको मछिन्द्रलाई लिग उपाधिबाट रोक्न अन्य कुनै क्लबले सकेनन् । एएफसीको क्लब लाईसेन्स नभएका कारण मछिन्द्रले गत वर्ष एएफसी कपको छनोट खेल्न पाएको थिएन । मछिन्द्रको स्थानमा दोस्रो स्थानमा रहेको आर्मीले एएफसी कप छनोट खेलेको थियो । यस वर्षका लागि मछिन्द्रले लाईसेन्स प्राप्त गरेको छ । अब मछिन्द्रले नेपालबाट एएफसी कप छनोटमा प्रतिनिधित्व गर्नेछ ।
![May be an image of 5 people and people standing](https://scontent.fktm6-1.fna.fbcdn.net/v/t39.30808-6/275060749_1002064420408221_7961387255182596818_n.jpg?_nc_cat=111&ccb=1-5&_nc_sid=0debeb&_nc_eui2=AeFONmnVFUGCeKwRSqZKHtjaGAONanyw1LoYA41qfLDUujYrBzHbt9zKG8Xxbs3x3qsNpKuqiHoZ85izo92rDHRw&_nc_ohc=GG9s6F-jk9gAX8Y0yFS&_nc_ht=scontent.fktm6-1.fna&oh=00_AT-apVHj3udcj7t3gxpS2CMt58GHX7v-UyzDsLAQoWelFA&oe=62492FD8)
यस सिजन दुई मुख्य सफलता हासिल गरेको मछिन्द्रको मोफसलको यात्रा भने सुखद देखिदैन । स्टार खेलाडीले भरिएको मछिन्द्र मोफसलको सर्वाधिक माग भएको टिम भएपनि नतिजामा फिक्का देखिन्छ । घरेलु फुटबलको प्रतिष्ठित प्रतियोगिता आहा रारा गोल्डकपबाट मछिन्द्रले मोफसल यात्रा सुरु गरेको थियो । सेमिफाइनलमा बिभागीय टोली एपीएफसंग पराजित भएपछि उसले मोफसल यात्रा ‘आहा’ हुन सकेन ।
लिग विजेता भैसकेपछि मछिन्द्रले नेपालको सर्वाधिक पुरस्कार राशीको खप्तड गोल्डकपबाट मोफसलको यात्रा तय गरेको थियो । सर्वाधिक २१ लाख रुपैयाँ सहितको ट्रफी उचाल्ने लक्ष्य सहित धनगढी पुगेको मछिन्द्र पहिलो खेलमै स्तब्ध बन्यो । स्टार खेलाडी बिमल घर्ती मगर, मनीष डांगी, बिशाल राई, देबेन्द्र तामाङ, रंजित धिमाल र प्रभावशाली बिदेशी खेलाडी सम्मिलित मछिन्द्रलाई उपाधिको प्रमुख दाबेदारको रुपमा हेरिएको थियो । तर सुदुरपश्चिममा टोलीले नमिठो हार ब्यहोर्यो । सी छनोटमा असफल मोफसलको टिम बागमतीसँग पराजित हुँदै मछिन्द्र प्रतियोगिताबाट बाहिरिएको थियो ।
धनगढीको असफल यात्रापछि मछिन्द्र राजर्षि जनक कप खेल्न सर्लाही पुग्यो । सुरुवाती दुई खेलमा जित निकाल्दै मछिन्द्र फाइनलमा पुग्यो । उपाधिका लागि मछिन्द्र डिफेन्डिङ च्याम्पियन पिप्ले युवा क्लब मकवानपुरसँग प्रतिस्पर्धामा उत्रिएको थियो । तर अन्तिम खेलमा पराजित हुँदै उसले मोफसलको अर्को टोलीलाई राजर्षिको उपाधि सुम्पियो ।
लिगको उपाधिसँगै मछिन्द्र एएफसी छनोटको तयारीमा छ । मोफसलको गोल्डकपलाई उसले एएफसी छनोटको तयारीको रुपमा लिएको छ । तर नतिजाका हिसाबले मछिन्द्रलाई मोफसल ‘फापेको’ छैन । टिम निर्माणमा ठुलो धनराशी खर्चिएको मछिन्द्रले नाम अनुसारको नतिजा काठमाडौं बाहिर निकाल्न सकेको छैन ।
![May be an image of 6 people, people playing football, people standing and grass](https://scontent.fktm6-1.fna.fbcdn.net/v/t39.30808-6/275016440_1002064870408176_8662082723784889572_n.jpg?_nc_cat=107&ccb=1-5&_nc_sid=0debeb&_nc_eui2=AeG8IDsc6TWKJx3nqM0mvPATeFKZzNssnbd4UpnM2yydt6eE8mUn7ilpALK8UGqpYiAoaWw_rQz8no03ZXmJ5vvu&_nc_ohc=RrblMY5Gc40AX-g560P&_nc_ht=scontent.fktm6-1.fna&oh=00_AT8aQK6c4XhjGWatV73o5P96RnHVUmjYEAp-rxIlahh5eA&oe=6248C786)
मछिन्द्रलाई लगातार दोस्रो पटक लिग बिजेता बनाएका मुख्य प्रशिक्षक प्रवेश कटुवाल क्लब इतिहासका सर्वाधिक सफल प्रशिक्षक हुन् । मछिन्द्रलाई ऐतिहासिक रुपमा एएफसी कपको छनोटसम्म पुर्याएका झापाली प्रशिक्षक कटुवालले यस सिजन गोल्डकप उपाधिको स्वाद चाख्न पाएका छैनन् ।
मोफसलको गोल्डकप ठुला क्लबका लागि राम्रो आम्दानीको स्रोत पनि हो । नेपालमा लिगको विजेता टिम पनि घाटामा जाने गर्छन् । मोफसलको गोल्डकपले ठुला क्लबलाई आर्थिक हिसाबले सहयोग गर्ने गरेका छन् । यस सिजन झण्डै २ करोडमाथि लगानी गरेको मछिन्द्रले मोफसलको प्रतियोगिताबाट आफुलाई आर्थिक रुपमा सबल बनाउने लक्ष्य राखेको थियो । तर मोफसलको खराब नतिजाले क्लबलाई आर्थिक रुपमा समेत नोक्सान परेको छ ।
‘अहिलेसम्म सहभागिता जनाएका गोल्डकपबाट लगभग ४५ लाख जति पुरस्कार राशी जित्ने संभावना थियो तर सबै गुमाएका छौं । यसले क्लबको आर्थिक सन्तुलनमा प्रभाव पारेको छ ।’ क्लबका म्यानेजर समेत रहेका उपाध्यक्ष अनिल श्रेष्ठ भन्छन् ।
मोफसलका गोल्डकपमा क्लबको नतिजाबाट श्रेष्ठ सन्तुष्ट छैनन् । ‘केही हदसम्म भाग्यले पनि साथ दिएको छैन ।’ उनी भन्छन्, ‘यसमा फ्रेन्चाईज फुटबल एनएसएल पनि एउटा कारण हो ।’
![May be an image of 4 people, people playing American football, people standing and grass](https://scontent.fktm6-1.fna.fbcdn.net/v/t39.30808-6/274101154_989260175021979_6679733365248249995_n.jpg?_nc_cat=110&ccb=1-5&_nc_sid=0debeb&_nc_eui2=AeHgd1v4gee_5STdbaVvLJ49AVv4oAXwJuIBW_igBfAm4oM-0GkeB_4ZQgq2vUsAf20UjoE58QyIN66a8sWJUpRP&_nc_ohc=QkLljgjaz7EAX-ZQydn&tn=zI0BQHv-sqr2Mpx_&_nc_ht=scontent.fktm6-1.fna&oh=00_AT_N2mUVuPFdVANW6FVMmLyk5IqPV-S1VJ5sdEVAELS4dA&oe=6248787E)
मछिन्द्रका अधिकांश खेलाडी महङ्गो मुल्यमा एनएसएलमा बिक्री भएका कारण प्रतियोगिताको अनिश्चितताले खेलाडीले ध्यान केन्द्रित गर्न नपाएको श्रेष्ठको बुझाई छ ।
‘मछिन्द्रका खेलाडी महँगो मूल्यमा एनएसएलका बिभिन्न क्लबमा अनुबंध भएका छन् । एनएसएलको विवादको असर खेलाडीमा समेत परेको छ । उनीहरुले ध्यान केन्द्रित गरेर खेल्न सकेका छैनन् ।’ उनी भन्छन् ।
‘लिग च्याम्पियन क्लबबाट धेरैको अपेक्षा हुन्छ । जून स्वभाविक छ । यही तरिकाले मछिन्द्र कसरी एएफसी कप छनोट खेल्छ भनेर कुरा उठिरहेको छ, यो धेरै चिन्ताजनक हो ।’ श्रेष्ठ भन्छन् ।