काठमाडौं । सातौं वरीयताका दिनेश प्रजापतिले सुर्य नेपाल गल्फ टुर अन्तर्गत सिजनको तेस्रो प्रतियोगिता सुर्य नेपाल एनपीजीए म्याच प्लेको उपाधि जितेका छन् ।
रोयल नेपाल गल्फ क्लबमा बिहीबार भएको ३६ होलको फाइनलमा १३ औं वरीयताका रमेश अधिकारीलाई ७/६ ले हराउँदै दिनेश च्याम्पियन बनेका हुन् ।
उपाधिसँगै दिनेशले ६० हजार प्राप्त गर्दा रमेशले ४२ हजार हात पारे ।
सुर्य नेपाल गल्फ टुरमा पहिलो उपाधि जित्ने क्रममा दिनेशले पहिलो नौ होलको खेलमा ४ होलको अग्रता बनाए।
१८ होलको समाप्तीमा दिनेश आठ होलको फराकिलो अग्रता बनाउन सफल रहे। खेलमा फर्कने संकेत देखाएका रमेशले १९ औं, २० औं, २१औं र २२औं होल लगातार जित्दै दिनेशको अग्रतालाइ चार होलमा घटाए।
दिनेशले २३ औं होल जित्दा रमेशले २४ औं र २५ औं होल आफ्नो पक्षमा पार्दै दिनेशको अग्रतालाइ तीन होलमा झारे। तर २६ औं र २७ औं होल आफ्नो पक्षमा पार्दै दिनेशले ५–होलको अग्रता बनाए। यसपछि दिनेशले २९ औं र ३० औं होल जित्दै ६ होल बाँकी रहँदा सहज जितका साथ उपाधि आफ्नो नाममा लेखाए।
प्रतियोगितामा आठौं वरीयताका धन बहादुर थापा तेस्रो भए। १८ होलको प्रतिस्पर्धा बराबरीमा टुङ्गिएपछि धनले प्ले–अफको पहिलो होलमा १० औं वरीयताका भुवन कुमार रोक्कालाई पराजित गरे। तेश्रो भएका धनले ३२ हजार र भुवनले २४ हजार प्राप्त गरे।
क्वाटरफाइनलमा पराजित चार खेलाडीहरू नेपाल नम्बर एक प्रो शुक्र बहादुर राई, दोस्रो वरीयताका भुवन नगरकोटी, तेस्रो वरीयताका जयराम श्रेष्ठ र पाँचौ वरीयताका रबि खड्काले समान ११ हजार प्राप्त गरे।
यसैगरी पहिलो चरणबाट बाहिरिएका टंक बहादुर कार्की, सञ्जोक मोक्तान, कृष्णमान राजबाहक, प्रदीप कुमार लामा, सञ्जय लामा, सुर्य प्रसाद शर्मा, बलभद्र राई र रामे मगरले समान छ हजार प्राप्त गरे।
गत सिजनको उत्कृष्ट १६ प्रोफेसनल गल्फरले प्रतियोगितामा भाग लिने भएतापनि चार खेलाडी देश बाहिर रहेकोले उत्कृष्ट २० सम्मका खेलाडीले भाग लिएका थिए। सुर्य नेपाल प्रालिको प्रायोजनमा पीजीए नेपालले आयोजना गरेको प्रतियोगिताको कुल पुरस्कार राशी २ लाख ५० हजार रहेको थियो।
विजयी खेलाडीहरुलाई सुर्य नेपाल प्रालिका मार्केटिङ म्यानेजर केशव प्रधान र ब्रान्ड म्यानेजर विदुर राज अधिकारीले पुरस्कार वितरण गरे। सुर्य नेपाल गल्फ टुर अन्तर्गत २०२२–२३ सिजनको चौंथो प्रतियोगिता सुर्य नेपाल वेस्टर्न ओपन पोखरास्धित हिमालयन गल्फ कोर्षमा फाल्गुन १० गतेदेखि आयोजना हुनेछ।