काठमाडौं । नेपाल सुपर लिग एनएसएको शनिबारको खेलमा धनगढी एफसी र ललितपुर सिटी एफसीले बराबरी खेलेका छन् ।
शनिबार दशरथ रंगशालामा धनगढी र ललितपुरले गोल रहित बराबरी खेल्दै अंक बाँडेका हुन् ।
खेल अवधिभर दुवै टिम एक अर्काविरुद्ध आक्रमण बुनेपनि गोल गर्न भने सकेनन् ।
धनगढी र ललितपुरलाई यस सिजनको एनएसएलको उपाधि दाबेदारको रुपमा लिईएको छ ।
ललितपुरलाई पहिलो हाफमा भाग्यले पनि साथ दिएन । खेलको ३४ औं मिनेटमा धनगढी गोलको नजिक पुगेको थियो ।
अनन्त तामाङको क्रसमा निखिल कदमले हेड पोस्टको माथि लागेर टच लाईन बाहिर झरेको थियो । जसलाई धनगढीका गोलकिपर मोहमद टाहाले तत्कालै समातेका थिए ।
ललितपुरका गोलकिपर जेफ्री बाल्टसले उत्कृष्ट खेल प्रर्दशन गरेपछि धनगढीले तेस्रो खेलमा भने जित निकाल्न असफल रह्यो ।
दोस्रो हाफमा धनगढीका अहमद हिजाजीको दुई शक्तिशाली प्रयासलाई बाल्टसले असफल बनाएका थिए । सुरुवातमा हिजाजीको हेड प्रहारलाई बाल्टसले रोकेका थिए ।
दोस्रो पटक रन्दिप पाडेलको उत्कृष्ट क्रसमा हिजाजीकै प्रहारलाई बाल्टसले उत्तिकै उत्कृष्ट ढङ्गले बचाएका थिए ।
त्यसपछि धनगढीका फाल्लो डियाग्ने डिबक्स बाहिरबाट हानेको घातक भली प्रहारलाई बाल्टसले पोस्ट बाहिर पठाईदिएका थिए ।
ललितपुरले समेत धनगढीविरुद्ध लगातार आक्रमण बनेपनि सफल हुन सकेन । खेलको अन्तिम मिनेटमा डिबक्स भित्र बिना मार्क रहेको पापा इबु कोबेले गोल गर्न सकेनन् ।
बराबरीको नतिजा निकाल्दै धनगढी लिगको शीर्ष स्थानमा यथावत छ । धनगढीले ३ खेलबाट ७ अंक जोडेको छ ।
दोस्रो स्थानको ललितपुरले २ खेलबाट ५ अंक जोडेको छ ।
