इटहरी । इटहरी गोल्डकपलाई हेर्दा सफल टोली हो त्रिभुवन आर्मी । २०७५ को बिजेता र २०७८ को उपबिजेता बनेको आर्मी ४ वर्षको अवधिमा तेश्रो पटक फाइनल पुग्ने लक्ष्यका साथ मैदान उत्र्दैछ । आर्मीको प्रतिद्धन्द्धीको रुपमा चर्च व्बाइज युनाइटेड रहेको छ ।
१३ औं संस्करणको इटहरी गोल्डकपको फाइनलिष्ट बन्न दुई ए डिभिजन क्लबको भिडन्त रोचक बन्ने देखिन्छ । आजको खेल दुवै टोलीका लागि ए डिभिजन लिगको तयारी समेत हुनेछ ।
भरखरै ए डिभिजनमा बढुवा भएको चर्च व्वाइजका लागि आर्मी नौलो प्रतिद्धन्द्धी होइन् ।
यस अघि कोशी प्रदेशमै आयोजना भएको मनमोहन दुहवी गोल्डकप, झापाको हाम्रो पुर्वाञ्चल गोल्डकप लगायतका प्रतियोगितामा आमनेसामने भइसकेका छन् । तर ए डिभिजनमा बढुवा भएपछि चर्च व्वाइजको खेल शैली परिर्वतन भएको छ ।
नेपाली मुलका अमेरिकी प्रशिक्षक प्रदिप हुमागाई र दर्शन भक्तराजको प्रशिक्षणमा रहेको टोलीले लिगमा समेत प्रभावशाली प्रर्दशन गरिरहेको छ ।
गोलरक्षकमा अफ्रिकी खेलाडी प्रिसो हुनेछन् । नेपाली राष्ट्रिय टोलीको अनुभव बटुलेका कमल श्रेष्ठ समेत चर्च व्वाइजमा उपलब्ध हुनेछन् । आशिष चापागाई, प्रशान्त लक्सम, सनम राई, साइमन लिम्बु, सुभाष गुरुङ, विकु राई लगायतका खेलाडीहरु टिममा रहेका छन् ।
भारतीय आइलिगको अनुभव बटुलेका गगनदिप सिंह समेत चर्च व्वाइजका महत्वपुर्ण खेलाडी हुन् । बेम्पा र फ्रयाङकलिन समेत टोलीमा छन् । आयोजक राष्ट्रिय जागृति माथि जित दर्ता गर्दै चर्च व्बाइज सेमीफाइनलसम्म पुगेको हो ।
यता इटहरीको मैदानमा आर्मी शसक्त टोली हो । यसअघिका संस्करणमा समेत घरेलु दर्शक पाएको आर्मीको खेल इटहरीबासीको रोजाईमा पर्दै आएको छ । झापाको रोलिङ क्लबमाथि फराकिलो जितका साथ आर्मीले अन्तिम ४ मा स्थान बनाएको हो ।
जिलेस्पीजंग कार्कीको कप्तानीमा रहेको आर्मीसँग राष्ट्रिय टोलीका गोलरक्षक विकेश कुथु, डिफेन्डर सेसेहाङ आङदाम्बे, दिनेश हेन्जन, पदम तामाङ, युद्ध शाही, टंक बस्नेत, टेकबहादुर बुढाथोकी लगायतका पूर्वको फुटबलका अनुभवी खेलाडीहरु हुनेछन् । सदावहार प्रर्दशनका कारण आर्मी पूर्वेली दर्शकको रोजाईमा पर्दै आएको छ ।
दुवै टोलीसँग ए डिभिजनमा उत्कृष्ट प्रर्दशन गरेका खेलाडीहरु भएको कारण जितका लागि निक्कै संघर्ष गर्नुपर्ने हुन्छ । यस खेलको विजेताले उपाधिको लागि सरगमाथा युथ क्लबसँग खेल्नेछ ।
