इटहरी । कप्तान अफिज ओलावाले प्रेरित खेलमा सहज जित निकाल्दै मछिन्द्र क्लब १३ औं इटहरी गोल्डकपको सेमिफाइनलमा प्रवेश गरेको छ ।
इटहरी रंगशालामा जारी प्रतियोगिताको तेश्रो क्वाटरफाइनलमा पाहुना टोली भारतको कञ्चनजंघा एफसी सिलगढी माथि ५-२ गोल अन्तरको जित निकाल्दै मछिन्द्रले अन्तिम ४ मा स्थान बनाएको हो ।
मछिन्द्रको जितमा कप्तान ओलावालेले ४ गोल गरे । बिजय भुजेलले १ गोल थपे । कञ्चनजंघाका अनिश राईले २ गोल गरेपनि हार टार्न सकेनन् । खेलको सुरुवाती अग्रता कञ्चनजंघाले लिएको थियो ।
१५ औं मिनेटमा अतिश राईको पासमा अनिश राईले अग्रता दिलाएका थिए । ३९ औं मिनेटमा ओलवालेले व्यक्तिगत पहिलो गोल गर्दै खेल बराबरीमा ल्याए । पहिलो हाफ १-१ गोलको बराबरीमा सकिएको खेलको दोश्रो हाफमा ५ गोल सम्भव बन्यो ।
६२ औं मिनेटमा ओेलावालेले काउन्टरमा व्यक्तिगत दोश्रो गोल गर्दै मछिन्द्रलाई अग्रता दिलाए । ४ मिनेट नवित्दै ओलावालेले ह्रयाट्रिक पूरा गरे । कञ्चनजंघाका समिल हल्दारले शौरभ लिम्बुलाई डिबक्सभित्र फाउल गरेपछि पाएको पेनाल्टीको अवसरलाई ओलावालले जाली चुमाउँदै ह्याट्रिक पूरा गरेका हुन् । मछिन्द्रको गोल यतिमै रोकिएन् । ८२ औं मिनेटमा सब्स्टिच्युट खेलाडी बिजय भुजेलले मछिन्द्रको अग्रता ४-१ बनाए । उनले लामो दुरीबाट गरेको प्रहार सिधै जाली चुमेको थियो ।
८८ औं मिनेटमा ओलावालेले व्यक्तिगत गोल संख्या ४ पुर्राए । इन्जुरी समयमा अनिशले कञ्चनजंघाका लागि दोश्रो गोल गरेपनि जितका लागि पर्याप्त भएन् । प्रदिप भण्डारीको स्थानमा मछिन्द्रका गोलरक्षक सुरेश साटा मैदान प्रवेश गरेको ३ मिनेट नवित्दै गोल व्यहोर्न पुगेका थिए ।
खेलमा ४ गोल गरेका मछिन्द्रका कप्तान ओलावाले म्यान अफ दि म्याच घोषित हुँदै नगद १० हजार प्राप्त गरे ।
अन्तिम क्वाटरफाइनल खेलमा मंगलबार गत संस्करणको उपविजेता त्रिभुवन आर्मी क्लब र रोलिङ क्लब झापाबिच प्रतिस्पर्धा हुने ।
पहिलो हाफमा निक्कै दबाब सृजना गरेको कञ्चजंघाले दोश्रो हाफमा फितलो प्रर्दशन गरेको थियो । दुवै टोलीले केही सुन्दर मुभहरु बनाएपनि सदुपयोग गर्न सकेनन् । २३ औं मिनेटमा डिबक्स नजिकैबाट ओलावालेको प्रहार आकासिएको थियो । ६१ औं मिनेटमा दिवाकर चौधरीले गरेको प्रहारलाई कञ्चनजंघाका गोलरक्षक पज्वल शर्माले बचाए । ७७ औं मिनेटमा गोलरक्षक बिट भइसकेको अवस्थामा ओलावालेको प्रहार डिफेन्डरले क्लियर गरिदिए । खेलको ३१ औं मिनेटमा कञ्चनजंघाका सुब्रतो सोरेनले डिबक्स नजिकैबाट गरेको प्रहार आकासिएको थियो । इन्जुरी समयमा वान भर्सेस वानको अवस्थामा निवाङ तामाङको प्रहार फ्रेममा पर्न सकेन् ।
खेलपछि प्रतिक्रिया दिँदै मछिन्द्रका प्रशिक्षक सन्तोष न्यौपानले दोश्रो रोजाइका खेलाडीहरुले समेत उत्कृष्ट खेल प्रर्दशन गरेको बताए । उनले सुरुवातमा गोल व्यहोर्न पुगेपनि कमब्याक जित निस्किएको बताए । टिमका महत्वपुर्ण सदस्यहरुमा राष्ट्रिय टोलीको क्याम्पमा भएको र बिमल घर्ती मगर लगायतका केही खेलाडीहरु घाइते भएकाले विश्राम दिइएको बताए । खेलाडीहरुको इन्जुरीका कारण टिमको प्रर्दशनमा तलमाथि भइरहेको उनले बताए ।
यता कञ्चनजंघाका प्रशिक्षक दिनकर क्षेत्रीले खेलाडीहरुको गल्तीका कारण गोल व्यहोर्न पुगेको बताए । उनले पेनाल्टीमा गोल व्यहोरेपछि खेलाडीहरुको मनोबल गिरेर थप गोल हुन पुगेको बताए । काउन्टर अट्याकमा ३ गोल व्यहोर्न पुग्नु नै पराजयको मुख्य कारण भएको उनले बताए ।