एजेन्सी । इंग्ल्याण्डमा जारी आईसीसी एकदिवसीय विश्वकप क्रिकेटमा आयोजक इंग्ल्याण्डले न्युजिल्याण्डलाई ३०६ रनको लक्ष्य दिएको छ ।
म्यानचेस्टरस्थित ओल्ड ट्राफोर्डमा टस जितेर पहिले ब्याटिङ गरेको इंग्ल्याण्डले निर्धारित ५० ओभरमा ८ विकेटको क्षतिमा ३ सय ५ रन बनायो ।
इंग्ल्याण्डका लागि ओपनर जोनी बेयस्ट्रोले शतकीय इनिङ्स खेले । उनले ९९ बलमा १५ चौका र १ छक्काको मद्दतले १ सय ६ रनको शतकीय इनिङ्स खेले । यस्तै अर्का ओपनर जासन रोयले ६० रनको अर्धशतकीय इनिङ्स खेले ।
कप्तान इयान मोर्गेन ४२, जोय रुट २४, आदील रशिद १६, लाइम प्लुन्केट १५ तथा बेन स्ट्रोक्स र जस बट्लरले समान ११/११ रनको योगदान गरे ।
न्युजिल्याण्डका ट्रेन्ट बोल्ट, म्याट हेनरी र जेम्स निशमले समान २/२ विकेट हात पारे ।
आज दुवै टोली जित निकाल्दै सेमिफाइनल पुग्ने लक्ष्यसहित मैदान उत्रिएका छन् । सेमिफाइनल यात्राका लागि दुवै टोलीलाई आजको खेल जित्नै पर्ने दबाब रहेको छ । किनकी दुवै टोलीको यो अन्तिम लिग खेल हो ।
यस खेलमा पराजित हुने टोलीको सेमिफाइनल सम्भावना निकै कमजोर बन्नेछ । लिगको ८ खेलमा ५ जित र २ हार व्यहोरेको न्युजिल्याण्ड ११ अंक जोडेर अंक तालिकाको तेस्रो स्थानमा रहेको छ ।
समान खेलबाट ५ जित तथा ३ हार व्यहोरेको इंग्ल्याण्ड ११ अंकसहित चौथो स्थानमा रहेको छ ।
