काठमाडौं । नेपाली राष्ट्रिय टोलीका लेग स्पिनर सन्दीप लामिछाने क्यानाडामा जारी ग्लोबल टी-२० क्रिकेट लिगमा उत्कृष्ट प्रदर्शन जारी राखेका छन् । लिग अन्तर्गत अहिले जारी वेष्ट इण्डिज 'बी' टिमविरुद्ध उत्कृष्ट बलिङ गर्दै सन्दीपले ३ विकेट लिएका छन् ।
मोन्ट्रेल टाइगर्सबाट खेलिरहेका सन्दीपले वेष्ट इण्डिज 'बी' विरुद्ध चार ओभर बलिङ गर्दै ३१ रन खर्चेर ३ विकेट लिएका हुन् । सन्दीपले ३ विकेट लिएपछि वेष्ट इण्डिज 'बी' ले मोन्ट्रेल टाइगर्सलाई जितका लागि १६३ रनको लक्ष्य दिएको छ ।
प्रतियोगितामा यो सन्दीपको आठौं विकेट हो । सन्दीपले अघिल्ला तीन खेलमा समान एक एक विकेट लिएका थिए । त्यस्तै चौथो खेलमा दुई विकेट लिएका थिए ।
यो लिगको लागि सन्दीप छैटौं चरणमा छानिएका थिए । भारतम सम्पन्न इन्डियन प्रिमियर लिग (आईपीएल) लिगमा दिल्ली डेयरडेभिल्सबाट खेलेका सन्दीप क्यानाडाको लिगपछि आगामी अगस्टमा क्यारेवियन प्रिमियर लिग (सीपीएल) खेल्नेछन् ।
