काठमाडौं । चेवहाल युवा क्लब सहिद स्मारक 'सी' डिभिजन लिग छनोटको दोस्रो चरणमा प्रवेश गरेको छ ।
सातदोबाटोस्थित एन्फा कम्प्लेक्समा आइतबार चिवहालले बालकुमारी सृजना क्लबलाई ४–१ गोल अन्तरले पराजित गर्याे । जितसँगै समूह एचबाट चिवहालको ६ अंक जोड्दै दोस्रो चरणमा पुग्न सफल भयो ।
समूह 'एच' बाट बालकुमारी र बौद्ध फुटबल क्लबले अंक जोड्न सकेको छैन ।
यता, आइतबार नै भएको खेलमा रसुवाको सुन्धारा युवा क्लबले हेटौडाको विजय युथ क्लबलाई ३–१ गोल अन्तरले पराजित गर्याे ।
जितसँगै समूह 'जी' मा रहेको सुन्धाराले दुई खेलबाट ४ अंक जोडेको छ । सुन्धाराको दोस्रो चरण सम्भावना कायमै रहेको छ ।
यस समूहबाट विजय युथ भने बाहिरियो । एक खेल खेल्न बाकी रहेको विजय युथले अंक जोड्न सकेको छैन । यस समूहमा रहेको गुर्खाज युनाईटेड फुटबल क्लबको १ अंक रहेको छ ।
गुर्खाजको पनि दोस्रो चरण पुग्ने सम्भावना कायमै छ । अब अन्तिम खेलमा विजय युथलाई भारी अन्तरले पराजित गरे गुर्खाज दोस्रो चरणमा पुग्ने छ ।
