काठमाडौं । प्रधानमन्त्री कप एकदिवसीय राष्ट्रिय पुरुष क्रिकेट प्रतियोगितामा आज (शनिबार) समुह बीका दुई खेल हुदैछ । कीर्तिपुर मैदानमा आर्मी र नेपाल पुलिस क्लब तथा मुलपानी मैदानमा प्रदेश नम्बर २ र प्रदेश नम्बर १ बीच प्रतिस्पर्धा हुनेछ ।
समुह बीको शीर्ष टोली आर्मी समुह चरणको अन्तिम खेलमा जित निकाल्दै सेमिफाईनल प्रवेश गर्न चाहन्छ । सुरुवाती तीन खेलमा स्पष्ट जित निकालेको आर्मीलाई अन्तिम ४ मा प्रवेश गर्ने अवसर समेत प्राप्त छ । उद्घाटन खेलमा प्रदेश २ लाई हराएको आर्मीले त्यसपछि प्रदेश १ र कर्णाली प्रदेशलाई पराजित गरेको थियो ।
पुलिस समेत अघिल्लो चरण प्रवेशको यात्रा सहज बनाउन आर्मीविरुद्व जित निकाल्न चाहन्छ । पुलिसले पहिलो खेलमा कर्णाली र दोस्रो खेलमा प्रदेश १ लाई हराएको थियो ।
विभागीय डर्बीमा दुवै टिम जित निकाल्दै सेमिफाईनलको यात्रा सुरक्षित गर्ने लक्ष्यमा हुनेछन् ।
आजै हुने अर्को खेलमा अघिल्लो चरण प्रवेशको गणितिय सम्भावना सहित प्रदेश २ र प्रदेश १ मैदानमा उत्रनेछन् । दुवै टिमले समुह चरणको खेलमा कर्णाली प्रदेशमाथि जित निकालेको थिए । कर्णाली प्रदेश अंक विहिन हुदै प्रतियोगिताबाट बाहिरिसकेको छ ।
समुह बीको शीर्ष स्थानको आर्मीको ३ खेलबाट ६ अंक छ । पुलिस २ खेलबाट ४ अंक सहित दोस्रो स्थानमा रहेको छ । प्रदेश १ भने ३ खेलमा १ मा जित निकाल्दै २ अंक छ । भने चौथौ स्थानको प्रदेश २ ले २ मा १ मा जित निकाल्दै २ अंक सहित तालिकाको चौथो स्थानमा छ ।
कर्णाली प्रदेश अंक विहिन हुदै प्रतियोगिताबाट बाहिरिएको छ ।
