काठमाडौं । प्रधानमन्त्री कप एकदिवसीय राष्ट्रिय पुरुष क्रिकेट प्रतियोगितामा आज (बिहिबार) एक खेल हुदैछ ।
कीर्तिपुरस्थित टियु मैदानमा हुने खेलमा सुदुरपश्चिम प्रदेश र प्रदेश नम्बर ५ बीच प्रतिस्पर्धा हुनेछ । अघिल्ला खेल गुमाएका दुवै टोली बिहिबार पहिलो जित निकाल्ने लक्ष्यसहित मैदान उत्रने छन् ।
अघिल्लो चरण प्रवेशका लागि गणितीय सम्भावना कायम राख्न दुवै प्रदेशलाई जित आवश्यक रहेको छ । सुदुरपश्चिम प्रदेश पहिलो खेलमा एपीएफसंग पराजित भएको थियो । प्रतियोगिताकै कान्छा कप्तान शेर मल्लको नेतृत्वमा रहेको सुदुरपश्चिममा युवा खेलाडीको जमात रहेको छ ।
यस्तै प्रदेश ५ पहिलो खेलमा प्रदेश ३ संग पराजित भएको थियो । प्रदेश ५ कृष्ण कार्कीको कप्तानीमा रहेका छन् ।
समूह 'ए' मा रहेका दुवै टोलीले अंक जोड्न सकेका छैनन् । एक खेलमा एक हार भोगेको सुदुरपश्चिम अंक तालिकाको तेस्रो स्थानमा रहेको छ भने प्रदेश ५ पुछारमा रहेका छन् ।
