काठमाडौं । प्रधानमन्त्री कप एक दिवसीय राष्ट्रिय पुरुष क्रिकेट प्रतियोगितामा आज (बुधबार) दुई खेल हुदैछ । काठमाडौंका कीर्तिपुर मैदानमा कर्णाली र प्रदेश २ तथा मुलपानी मैदानमा पुलिस र प्रदेश १ बीच प्रतिस्पर्धा हुनेछ ।
अघिल्ला दुई खेलमा गुमाएको कर्णाली प्रतियोगिताको पहिलो जितको खोजीमा हुनेछ । अघिल्लो चरण प्रवेशको गणितिय सम्भावना कायम राख्न कर्णालीलाई जित आवश्यक छ । पहिलो खेलमा पुलिससंग पराजित कर्णाली दोस्रो खेलमा त्रिभुवन आर्मी क्लबसंग पराजित भएको थियो ।
कर्णालीसंग प्रतिस्पर्धा गर्न लागेको प्रदेश २ समेत प्रतियोगितामा पहिलो जितको खोजीमा हुनेछ । पहिलो खेल आर्मीसंग गुमाएको प्रदेश २ ले दोस्रो खेलमा कर्णालीसंग खेल्न लागेको हो । मेहबुव आलम नेतृत्वको प्रदेश दुई समेत जित निकाल्दै अघिल्लो चरण प्रवेशको सम्भावना बलियो बनाउने लक्ष्यमा छ ।
आजै हुने समुह बीको दोस्रो खेलमा पुलिस र प्रदेश १ भिड्नेछन् । पुलिस प्रतियोगितामा लगातार दोस्रो जितको खोजीमा हुनेछ भने प्रदेश १ ले पुलिसविरुद्व अंक जोड्ने प्रयास गर्नेछ । पहिलो खेलमा पुलिसले कर्णाली प्रदेशलाई हराएको थियो भने प्रदेश १ टिम विभागीय टोली आर्मीसंग पराजित भएको थियो ।
समुह बीम आर्मी ३ खेलबाट सतप्रतिशत जित सहित ६ अंक बटुलेर तालिकाको शीर्ष स्थानमा छ । पुलिस १ खेलबाट २ अंक सहित दोस्रो, कर्णाली २ खेलबाट अंक विहिन हुदै तेस्रो, प्रदेश १ भने १ खेलबाट अंक विहिन हुदै चौथो र प्रदेश २ समेत १ खेलबाट अंक विहिन तालिकाको पुछारमा छ ।
समुहका शीर्ष दुई टोलीले नकआउट चरणमा स्थान बनाउनेछन् ।
