काठमाडौ । लिग च्याम्पियन सिग्नेचर मनाङ मस्र्याङ्दी क्लबले एएफसी कपको चौथो खेलमा भारतीय क्लब मिनर्वा पञ्जाबसंग खेल्दैछ । घरेलु मैदानमा हुने खेलमा मनाङले बुधबार भारतीय आई लिग च्याम्पियन क्लबसंग प्रतिस्पर्धा गर्न लागेको हो ।
मनाङका प्रशिक्षक छिरिङ लोप्साङले भारतीय आईलिग च्याम्पियन मिनर्वासँग दोस्रो लेगको खेलमा स्पष्ट तीन अंकका लागि खेल्ने बताएका छन् ।
‘हामी मिनेर्वासँग स्पष्ट तीन अंकका लागि खेल्छौँ ।’ अभ्यासको क्रममा एन्फा टेक्निकल सेन्टरमा भेटिएका उनले खेलपाटीसंग भने ।
‘हामीसँग बराबरीको पनि विकल्प छैन । हामीले सुरुवाती दुई खेलमा पराजय भोगिसकेका छौँ, अब अगाडी बढ्न जित आवश्यक छ ।’ प्रशिक्षक छिरिङले भने ।
मनाङले यसअघि भएको तीन खेलमा एक बराबरी खेलेको छ । दुई खेलमा हार ब्यहोरिसकेको छ ।
सुरुवाती तीन खेलबाट मनाङले समुह ईमा मात्र १ अंक जोडेको छ ।
मनाङले एएफसी कपको पहिलो खेलमा बंगलादेशको अवहानी लिमिटेडसँग १–० गोल अन्तरले पराजित भएको थियो ।
दोस्रो खेलमा भारतीय सुपरलिग च्याम्पियन चेन्नईन एफसीसँग २–० गोल अन्तरले पराजित भयो । मनाङले पहिलो लेगमा मिनर्वासँग २–२ को बराबरी खेलेको थियो ।
मनाङले एएफसी कपमा मिनर्वासँग तेस्रो हप्तामा दोस्रो पटक भिड्न लागेको हो ।
अप्रिल १ मा मनाङले कालिङ्गा रंगशालामा भएको खेलमा २–२ को बराबरी खेलेको हो । लगातारको खेलले मनाङलाई केही सहज हुने प्रशिक्षक छिरिङको भनाई छ ।
‘हामीले लगातार मिनर्वासँग खेल्दैछौँ । अब घरमा खेल्न केही सहज हुनेछ । समर्थकको पनि राम्रो साथ रहनेछ ।’ उनले भने ।
उनले यसअघिको खेलमा राम्रो खेल्दा समेत गोल ननिस्कदाँ अन्तिममा बराबरीमा रोकिएको बताए । ‘हामीले अवे खेलमा पनि राम्रो खेलेको हो । बारम्बार खेलमा हाबी भएपनि पाएको पेनाल्टी सहित केही राम्रो अवसर सदुपयोग गर्न सकेनौँ । अब त्यस्तो हुँदैन ।’ उनले भने ।
मनाङले यस अघि दुई खेल खेलेका भारतीय डिफेन्डर मोहम्मद आसिफलाई फिर्ता पठाएको छ । प्रशिक्षक छिरिङले आसिफलाई रिलिज गरेको बताए ।
‘हामीसँग अन्य दुई राम्रा डिफेन्डर छन् । उनीहरु बेन्चमा बसेका छन् । आसिफले पनि घरायासी समस्या देखायो । हामीले रिलिज गरेको छौँ ।’ उनले भने ।
अव मनाङले मिनर्वासँगको खेलमा आफिजको स्थानमा देबेन्द्र तामाङ र साहिद अजिज मध्य एकलाई स्थान दिनेछ ।
यता, मनाङका कप्तान विराज महर्जनले पनि मिनर्वाविरुद्व जितका लागि खेल्ने बताए ।
‘हामी मिनर्वासँग स्पष्ट तीन अंकका लागि खेल्छौँ ।’ उनले भने ।
‘सबै खेलाडी तयारी छौँ । तयारी राम्रो रहेको छ । भुवनेश्वरबाट फर्किए लगत्तै तयारीमा जुट्यौ । त्यसैले सहज हुनेछ ।’ उनले भने ।
दुई खेलमा जित र एक बराबरी खेलेको चेन्नईन ७ अंकका साथ शीर्ष स्थानमा छ ।
एक जित एक बराबरी र एक हारका साथ ४ अंक रहेको अवहानी लिमिटेड दोस्रो स्थानमा छ ।
तीन खेलमा तीनै बराबरी खेलको मिनर्वा तेस्रो स्थानमा र मात्र १ अंक जोडेको मनाङ समुहको अन्तिम स्थानमा छ ।
समुह ई को विजेताले मात्रै अघिल्लो चरणको यात्रा तय गर्नेछ ।
