काठमाडौं । प्रदेश नम्बर २ ले मनमोहन मेमोरियल अन्तर प्रदेश यु–१६ राष्ट्रिय क्रिकेट प्रतियोगिताको उपाधि जितेको छ । मंगलबार भएको फाइनलमा सुदुरपश्चिम प्रदेशलाई ४ विकेटले पराजित गर्दै प्रदेश २ च्याम्पियन बनेको हो ।
त्रिवि क्रिकेट मैदानमा सुदुरपश्चिमले दिएको १ सय ३४ रनको लक्ष्य प्रदेश २ ले २६ ओभर ३ बलमा मात्र ६ विकेट गुमाएर पुरा गर्यो ।
रोहन बिकले सर्वाधिक ३६ रनको पाली खेले । बिशाल पटेलले अविजित २८ तथा निखिल सिंहले २७ रनको योगदान गरे ।
प्रदेश ७ का आशिष भट्टले ३ तथा गोबिन्द बिष्टले १ विकेट हात पारे ।
टस जितेर पहिले ब्याटिङ गरेको प्रदेश ७ ले निर्धारित ओभरमा ९ विकेट गुमाएर १ सय ३३ बनायो । सुवाह ऐरले सर्वाधिक ४७ रन जोडे । यस्तै सन्दीप बिष्टले २८ तथा आशिष भट्टले २१ रन बनाए ।
प्रदेश २ का बिशाल पटेल र निखिल सिंहले समान ३/३ विकेट हात पारे ।
उपाधिसंगै प्रदेश नम्बर २ ले २ लाख ५० हजार रुपैयाँ र सोही रकम बराबरको खेल सामग्री प्राप्त गरेको छ ।
उपविजेता सुदुरपश्चिमले १ लाख ५० हजार रुपैयाँ र सोही बराबरको खेल सामग्री प्राप्त गरेको छ ।
-1736344782.jpeg)
