काठमाडौं । नेपाली राष्ट्रिय महिला फुटबल टोलीका मुख्य प्रशिक्षक हरि खड्काले ओलम्पिक छनोटको दोस्रो चरणमा सोचेको जस्तो प्रदर्शन गर्न नसकेको बताएका छन् ।
म्यानमारमा सम्पन्न छनोट खेल खेलेर स्वदेश फर्केपछि बोल्दै प्रशिक्षक खड्काले विविध कारणले छनोट उपलब्धि मुलक नभएको बताए ।
‘हामीले राम्रो रणनीति बनाएका थियौं तर म्यानमारमा यस पटक सोचे जस्तो उपलब्धि भएन,' स्वदेश फर्किएपछि प्रशिक्षक खड्काले भने ।
पहिलो पटक ओलम्पिक छनोटको दोस्रो चरणमा पुगेको नेपाल सुरुवाती दुई खेल गुमाएर प्रतियोगिताबाट बाहिरिएको थियो । पहिलो खेलमा नेपाल आयोजक म्यानमारसंग ३-१ ले पराजित भएको थियो ।
यस्तै दोस्रो खेलमा पनि नेपाल चिरपरिचित प्रतिद्वन्दी भारतसंग ३-१ ले नै पराजित भएको थियो । जसको कारण नेपालले साफ च्याम्पियनसिपको फाइनलमा व्यहोरेको हारको बदला लिन असफल भएको थियो ।
प्रशिक्षक खड्काले खेलाडीहरु आफ्नो रणनीतिमा चुकेको कारण म्यानमार र भारतसंग पराजित भएको बताए ।
‘हामीले पहिले गोल खाएपनि पुनरागमन गरेका थियौं । दोस्रो हाफमा मैले जुन हिसाबले खेलाडीहरुलाई बुझाएर पठाएको थिए त्यो हिसाबले खेलाडीले बुझ्न सकेन या बुझेनन्,’ प्रशिक्षक खड्काले भने, ‘मैले सुधार गर्नुपर्ने कुराहरु भारतसँगको खेलमा धेरै देखे । डिफेन्स, मिड र स्ट्राइकिङको ग्यापलाई सुधार गर्नुपर्ने छ । टिम सेटमा मैले धेरै काम गर्नुपर्ने छ ।’
नेपालले अन्तिम खेलमा भने इन्डोनेसियालाई २-१ गोल अन्तरले हराएको थियो । नेपालको जितमा दुवै गोल सावित्रा भण्डारीले गरेकी थिईन् ।
प्रशिक्षक खड्काले स्ट्राइकर सावित्राको प्रदर्शनमा आफुले निखार ल्याउन प्रयास गरेको बताए । प्रशिक्षक खड्काले भने, ‘मैले सावित्राको फिनिसिङ निखार्नु पर्नेछ ।’
यस्तै नेपाली महिला फुटबलको गोल मेसिन मानिने सावित्राले आफुहरुले प्रशिक्षकले दिएको निर्देशनलाई पुरा गर्न नसक्दा प्रतियोगितामा चुकेको बताईन् ।
‘हाम्रो स्ट्राइकर, मिडदेखि पाएको मौकालाई उपयोग गर्न सकेनौ र डिफेन्स लाइन पनि कमजोर देखियो,' सावित्राले भनिन्, 'प्रशिक्षकले दिएको निर्देशनलाई हामीले पूर्ण रुपमा पालना गर्न सकेनौ र चुक्यौ ।’
सावित्राले नेपालविरुद्ध म्यानमारलाई रेफ्रीले पेनाल्टी दिएको कारण प्रतियोगितामा खराब सुरुवात भएको बताईन् । उनले आफ्नो प्रदर्शन समेत खस्किएको बताईन् ।
‘मैले विशेष गरेर भारत र म्यानमारको लागि बढी फोकस गरेको थिए । अरु खेलमा पनि मेरो प्रर्दशन कमजोर बन्यो,' सावित्राले थपिन्, 'इन्डोनेसियासँगको खेलमा पहिलो हाफमा गोल गरेकाले दोस्रो हाफमा मेरो कन्फिडेन्स बढेको थियो ।त्यसकारण गोल गर्न सफल भए ।’
यस्तै सावित्राले नेपालको तयारीमा सधै कमी हुने गरेको बताईन् ।
