एजेन्सी । नेपाली राष्ट्रिय टिमका लेग स्पिनर सन्दीप लामिछानेले टी–ट्वान्टी क्रिकेटमा पछिल्लो एक बर्षको प्रर्दशन निकै सुन्दर रहेको बताएका छन् । टी–ट्वान्टी क्रिकेटमा ५० विकेट पुरा गरेका सन्दीपले अझै लामो यात्रा तय गर्न बाँकी रहेको उल्लेख गरे ।
‘एक बर्षको समयमा प्राप्त सफलता निकै सुन्दर रह्यो । अझै लामो यात्रा तय गर्न छ ।’ ५० विकेट पुरा गरेपछि उनले सञ्चारकर्मीसंग भने ।
ईन्डियन प्रिमियर लिग क्रिकेट आईपीएलमा आईतबार राति रोयल च्यालेन्जर्स बैंगलोरविरुद्व विकेट लिएसंगै सन्दीपले ५० विकेट पुरा गरेका छन् । गत सिजन आईपीएलबाट क्रिकेट करियर सुरु गरेको सन्दीपले विश्वका उत्कृष्ट फ्रेन्चाईज लिगहरुमा आफुलाई प्रमाणीत गरिसकेका छन् ।
सन्दीपले बैंगलोरका मोइन अलीलाई ३२ रनमा आउट गर्दै ५० विकेटको कोशेढुंगा पुरा गरेका थिए । सन्दीपले ४० टी–ट्वान्टी खेलमा ५० विकेट हात पारेका हुन् ।
आईतबार भएको खेलमा दिल्लीले बैंगलोरलाई पराजित गर्दै अघिल्लो चरण प्रवेशको यात्रा सहज बनाएको थियो । जसमा सन्दीपले समेत एक महत्वपुर्ण विकेट हात पारे ।
‘दिल्लीको जितमा सबैको योगदान उत्तिकै छ । मोईन अलीको विकेट निकै उत्कृष्ट रह्यो ।’ उनले थपे ।
सन्दीपले अघिल्लो चरण पुग्न सबैको जित आवश्यक रहेको भन्दै प्रतियोगितामा अगाडी बढ्न सबै खेल महत्वपुर्ण रहेको उल्लेख गरे ।
-1735306900.JPG)
