काठमाडौं । एएफसी कप अन्तर्गत समूह चरणको पहिलो खेल खेल्न बंगलादेशी लिग विजेता ढाका अबहानी लिमिटेड नेपाल आईसकेको छ ।
ढाका अबहानीले पहिलो खेलमा नेपालको लिग च्याम्पियन मनाङ मर्स्याङदी क्लबसंग खेल्नेछ । मनाङको होम रहेको पहिलो खेल सातदोबाटोस्थित एन्फा कम्प्लेक्स बुधबार हुनेछ ।
समूह 'ई' मा रहेको मनाङ र अबहानी दुवै टोली जित निकाल्ने लक्ष्यसहित मैदान उत्रने छन् । त्यसैले दुई टोलीबीचको खेल निकै प्रतिस्पर्धात्मक हुने अनुमान देखिएको छ ।
मनाङसंग खेल्ने अबहानीको टोलीमा बंगलादेश राष्ट्रिय फुटबल टोलीका ७ खेलाडी रहेका छन् ।
अबहानी कस्तो टोली हो त ? जान्नु होस् -
आकासे रङको जर्सीमा मैदान उत्रने ढाका अबहानी बंगलादेशको बलियो फुटबल क्लब हो । अबहानीले ६ पटक बंगलादेश प्रिमियर लिगको उपाधि उचाल्दै रेकर्ड बनाएको छ ।
अबहानीले लगातार तेस्रो पटक एएफसी कप खेल्न लागेको हो । तर, अबहानीले अहिलेसम्म समूह चरण पार गर्न सकेको छैन ।
अबहानी अहिले जारी लिगमा भने दोस्रो स्थानमा रहेको छ । अबहानी भन्दा अगाडी बसुन्धरा किंग्स रहेको छ । लिगको पछिल्लो ५ खेलमा अबहानीले ४ खेलमा जित हात पारेको छ ।
प्रशिक्षक :
३४ बर्षे पर्चुगिज प्रशिक्षक मारियो लेमोसलाई गत बर्षको डिसेम्बरबाट अबहानीले नियुक्त गरेको थियो । उनको आगमनसंगै अबहानीमा निकै राम्रो छाप छाडेका छन् ।
उनले सम्हालेका १४ खेलमध्ये १० खेलमा क्लबले जित हात पारेको छ । अबहानीलाई पहिलो पटक एएफसी कप समूह चरण पार गराउने उनको लक्ष्य रहेको छ ।
'हाम्रो तयारी राम्रो भएको छ । जुन सुकै प्रतियोगितामा पहिलो खेल निकै महत्वपूर्ण हुन्छ,' मनाङसंगको खेलअघि प्रशिक्षक मारियोले भने, 'हामीले मनाङ पनि राम्रो लयमा देखेका छौं । हामीले सकारात्मक नतिजाको अपेक्षा गरेका छौं ।'
प्रमुख खेलाडी
१. सन्डे छिजोबा
सन्डे छिजोबा निकै अनुभवी फरवार्ड हुन् । उनीसंग भारतमा खेलेको समेत अनुभव रहेको छ । छिजोबाले चुर्चिल ब्रदर्समा २०१४/२०१५को एक सिजन बिताएका थिए । उक्त सिजन उनको टिमले १३ गोल गर्दा उनले १० खेलमा ८ गोल गरेका थिए । त्यसैले प्रशिक्षक मारियोले पहिलो पटक एएफसी कपको समूह चरण पार गर्न उनीमाथि ठुलै आस गरेका छन् ।
२. शहिदुल युसुफ सोहिल
३० बर्षे गोलकिपर युसुफ सोहिल अबहानीका कप्तान समेत हुन् । यो सिजनमा उनले निकै राम्रो प्रदर्शन गरेका छन् । १० खेलमा उनले ९ गोल खाएका छन् । उनको अनुभवले नेपालमा निकै अबहानीलाई निकै सहयोग पुग्ने छ ।
'पहिलो खेल सधै महत्वपूर्ण हुन्छ । हामी ३ अंक प्राप्तिको लागि मैदान उत्रने छौं । हाम्रो टिम अहिले निकै सुधारिएको छ र सबै खेलाडीहरु लयमा रहेका छन् ।' सोहिलले भनेका छन् ।
३. बेल्फोर्ट केरभिन्स
निकै अनुभवी हाइटिका फरवार्ड बेल्फोर्ट केरभिन्सले धेरै राष्ट्रहरुमा लिग खेलेको अनुभव रहेको छ । फ्रान्स, अजरबैजान जस्ता देशमा समेत फुटबल खेलिसकेका उनी अबहानीका लागि प्रमुख हतियार हुन् ।
केरभिन्सले हालै भारतको करेला ब्लास्टर्स र जम्शेदपुर फुटबल क्लबबाट समेत प्रतिनिधित्व गरेका थिए । उनले त्यहाँ २ गोल तथा ५ असिस्ट गरेका थिए । त्यसैले उनी मनाङका लागि निकै खतरनाक हुन सक्ने छन् ।
४. विलिङटन प्रिओरी
फुटबलको देश मानिने ब्राजिलका विलिङटन प्रिओरी ढाका अबहानीका लागि निकै महत्वपूर्ण खेलाडी हुन् । मिडफिल्डबाट खेल्ने उनले यसअघि बोटाफोगो, जम्शेदपुर फुटबल क्लब, नर्थइस्ट युनाइटेड र साओ जोसे जस्ता क्लबबाट खेलीसकेका छन् ।
'प्रिओरी निकै अनुभवी खेलाडी हुन् । उनले भारतको इण्डियन सुपर लिग समेत खेलीसकेका छन् । उनीबाट हामीलाई धेरै अपेक्षा गरेका छौँ । आशा छ अन्य विदेशी खेलाडीले समेत राम्रो प्रदर्शन गर्नेछन ।' प्रशिक्षक मारियोले प्रिओरीबारे भनेका छन् ।
-1734879364.jpg)
-1734875597.jpg)
