एजेन्सी । भारतमा जारी १२ औं संस्करणको इण्डियन प्रिमियर लिग (आईपीएल) क्रिकेटमा आइतबार दुई खेल हुँदैछ ।
आइतबार हुने पहिलो खेलमा सनराइजर्स हैदरावाद र रोयल च्यालेन्जर्स बैंगलोरले प्रतिस्पर्धा गर्नेछन् । यस्तै दोस्रो खेलमा चेन्नई सुपर किङ्गस र राजस्थान रोयल्सबीच खेल हुनेछ।
हैदरावादमा हुने घरेलु टोली र बैंगलोरबीचको खेल अपरान्ह ४:१५ मा सुरु हुनेछ । दुवै टोली जित निकाल्ने लक्ष्यसहित मैदान उत्रने छन् ।
बैंगलोरविरुद्ध मैदान उत्रदा केन विलियम्सनको कप्तानीमा रहेको हैदरावाद दोस्रो जितको खोजीमा हुनेछन् । अघिल्ला दुई खेलमा एक जित र एक हार व्यहोरेको हैदरावाद २ अंकसहित पाँचौ स्थानमा छ ।
यता, विराट कोहली रहेको बैंगलोर भने पहिलो जितको खोजीमा हुनेछन् । बैंगलोरले अघिल्ला दुई खेल नै गुमाएको थियो ।
यस्तै साबिकको विजेता चेन्नईले घरेलु मैदानमा राजस्थानसंग खेल्नेछ । चेन्नई र राजस्थानबीचको खेल बेलुका ८:१५ मा सुरु हुनेछ ।
घरेलु मैदानमा चेन्नई लगातार तेस्रो जितको खोजीमा हुनेछ । तेस्रो स्थानको चेन्नईले २ खेलबाट ४ अंक जोडेको छ । जारी लिगमा महेन्द्र सिंह धोनीको कप्तानीमा रहेको चेन्नई एक मात्र अपराजित टोली हो ।
अजिंका रहानेको कप्तानीमा रहेको राजस्थान भने पहिलो जितको खोजीमा रहने छ । अघिल्ला दुई खेल गुमाएको राजस्थान पुछारमा रहेको छ ।
