एजेन्सी । किङ्स इलाभेन पन्जाबले भारतमा जारी १२ औं संस्करणको इण्डियन प्रिमियर लिग (आईपीएल) क्रिकेटमा विजयी सुरुवात गरेको छ । सोमबार भएको खेलमा राजस्थान रोयल्सलाई १४ रनले पराजित गर्दै पन्जाबले विजयी सुरुवात गरेको हो ।
जयपुरमा पन्जाबले दिएको १८५ रनको लक्ष्यसहित जवाफी ब्याटिङ गरेको राजस्थानले पुरै २० ओभर खेल्दै ९ विकेट गुमाएर १७० रन मात्र बनाउन सक्यो । राजस्थानका लागि जोश बट्लरले ६९ रनको अर्धशतकीय इनिङ्स खेलेपनि टोलीलाई जित दिलाउन सकेनन् ।
यस्तै राजस्थानका लागि सन्जु सामसनले ३०, कप्तान अजिंका रहानेले २७ तथा स्टिभ स्मिथले २० रन बनाए । पन्जाबका साम कुरान, मुजिब उर रहमान र अंकित राजपुतले समान २/२ विकेट लिए ।
यसअघि टस हारेर पहिले ब्याटिङ गरेको पन्जाबले पुरै २० ओभरमा ४ विकेट गुमाएर १८४ रन बनाएको थियो । पन्जाबको लागि क्रिस गेलले ७९ रनको अर्धशतकीय इनिङ्स खेले । योसंगै गेलले आईपीएलको ११३ खेलमा ४ हजार रन पुरा गरे ।
यस्तै पन्जाबका लागि सर्फ्राज खानले अविजित ४६ रन जोड्दा मायांक अग्रवालले २२ रन जोडे । राजस्थानका बेन स्टोक्सले २ विकेट लिए ।
