काठमाडौं । नेपाली राष्ट्रिय टोलीका सदस्य सन्दीप लामिछानेले दिल्ली क्यापिटल्सलाई इण्डियन प्रिमियर लिग (आईपीएल) को उपाधि जिताउने चाहना रहेको बताएका छन् ।
यसै साता सुरु हुने १२ औं संस्करणको आईपीएल खेल्न दिल्ली जानु अघि पत्रकार सम्मेलनमा बोल्दै सन्दीपले आफ्नो टोली बलियो रहेको र टोलीबाट उपाधि जित्ने लक्ष्य रहेको बताए । सन्दीप बुधबार बिहान दिल्ली प्रस्थान गर्नेछन् ।
'हामीले व्यक्तिगत प्रदर्शन राम्रो गर्नु पर्छ नै । तर, खुसी लागेको छ कि हाम्रो टिम निकै राम्रो बनेको छ । यो सिजन हामीले उपाधि जित्ने छौं । मेरो विचारमा यो पटक हामीले जित्ने मौका छ,' सन्दीपले भने ।
यस्तै सन्दीपले नेपाललाई गर्व गर्न लायक बनाउन आफु लागिपरेको र यस सिजन आफुलाई थप जिम्मेवारी थपिएको समेत बताए ।
'मलाई यस पटक फेरी नयाँ जिम्मेवारी थपिएको छ । किनकि मसंग मेरो राष्ट्रको नाम जोडिएको हुन्छ,' सन्दीपले भने, 'जति राम्रो गर्दै जान्छु हाम्रो लागि राम्रो हुन्छ । खेलाडीहरुको लागि राम्रो हुन्छ । मैले अवसरहरुलाई जति पक्रन सक्छु । सबैलाई फाइदा हुन्छ ।'
यस्तै सन्दीपले दिल्लीले आफुलाई अघिल्लो सिजनकै मुल्यमा रिटेन गरेको बताए । गत सिजन सन्दीपलाई दिल्लीले २० लाख भारुमा अनुबन्ध गरेको थियो ।
डेब्यु सिजनको ३ खेलमा उच्च प्रदर्शन गर्दै सन्दीपले ५ विकेट लिएका थिए ।
