विराटनगर । महिला साफ च्याम्पियनसिप फुटबलमा भारतले माल्दिभ्सलाई ६–० गोल अन्तरले पराजित गरेको छ । विराटनगरको सहिद रंगशालामा भएको समूह बीको पहिलो खेलमा भारतले एकतर्फ जित निकालेको हो ।
खेलको सुरुवातबाटै आक्रमक देखिएको भारतले आठौं मिनेटमा अग्रता बनाएको थियो । माल्दिभ्सका डिफेन्डरले क्लियर गर्न नसकेको बललाई भारतकी ग्रेस डाङमीले गोलकिपरलाई बिट गर्दै गोल गरेकी थिईन् ।
१३ औं मिनेटमा भारतले अग्रता दोब्बर बनायो । मिडफिल्डर ग्रेसको पासलाई सदुपयोग गर्दै फरवार्ड सन्धिया रङ्गनाथले गोल गरेकी थिईन् ।
२२ औं मिनेटमा ईन्दुमती काथिरसेनले तेस्रो गोल गरिन् । उनको कडा प्रहार गोलकिपरले रोक्न सकिनन् ।
२७ औं मिनेटमा सञ्जुले डिबक्सभित्रबाट प्रहार गरेको बलमा गोलकिपर मुखदर्शक रहिन् । उनले प्रहार गरेको बलले सिधै पोस्टको जाली चुमेको थियो ।
पहिलो हाफको ईन्जुरी समयमा रतनबाला देवीले करिब २५ यार्ड टाढाबाट प्रहार गरेको उत्कृष्ट फ्रिकिक गोलमा परिणत भएपछि पहिलो हाफमै भारत ५–० ले अगाडी बढेको थियो ।
दोस्रो हाफमा माल्दिभ्सविरुद्व निरन्तर दबाब बनाएको भारतले गोलका लागि अन्तिम समयसम्म पर्खन पर्यो । ९० औं मिनेटमा सन्जुले व्यक्तिगत दोस्रो गोल गर्दै भारतलाई ६–० को जित दिलाईन् ।
दोस्रो हाफको अधिकांश समय भारतले माल्दिभ्सको पोस्ट निरन्तर आक्रमण बुनेको थियो । माल्दिभ्सले कुनैपनि समय भारतको पोस्टमा एउटा पनि गतिलो मुभ बनाउन सकेन ।
भारतीय टिमकी प्रशिक्षक मेमाेल नेडुगाडन रक्की खेलाडीकाे प्रर्दशनबाट खुसी देखिइन् ।
'खेलाडीकाे प्रर्दशनबाट खुसी छु । जब यस्ताे नतिजा निस्कन्छ, हरेक प्रशिक्षक खुसीनै हुन्छ ।' उनकाे कथन थियाे ।
दाेस्राे हाफमा बल पाेजिसनमा राख्दै खेल्न आग्रह गरेकाे भन्दै उनले खेलाडीले अपेक्षा अनुसारनै प्रर्दशन गरेकाे उल्लेख गरिन् ।
जितसंगै भारतले समूह बीमा ३ अंक जोडेको छ । भारतले आगामी आईतबार श्रीलंकासंग खेल्नेछ ।
यता माल्दिभ्सकी प्रशिक्षक आतिफ मोहमदले समेत खेलाडीकाे प्रर्दशनमा सन्तुष्टि जनाए ।
'नतिजाबाट सन्तुष्ट छु । अघिल्लाे चरण प्रवेशकाे सम्भावना छ । श्रीलकालाइ हराएर अघि बढ्ने छाै ।' उनले भने ।
गर्मी बढेपछि 'कुलिङ ब्रेक'
सहिद रंगशालमा भारत र माल्दिभ्स भिड्दै गर्दा तापक्रमले ३२ डिग्री सेल्सियस नाघेपछि रेफ्रीले कुलिङ ‘ब्रेक’ दिएका थिए। तापक्रमले ३२ डिग्री सेल्सियस नाघेपछि रेफ्रीले कुलिङ ‘ब्रेक’ दिन सक्ने प्रावधान छ । रेफ्रीले पहिलाे हाफकाे ३० औ मिनेटमा खेल रोक्दै कुलिङ ब्रेक दिएका थिए । उनले ३ मिनेट खेल रोकेका थिए ।
