एजेन्सी । इन्ग्लिश प्रिमियर लिग फुटबलमा लिभरपुलले सहज जित निकालेको छ । आइतबार भएको खेलमा लिभरपुलले बर्नलीलाई ४-२ गोल अन्तरले पराजित गर्यो ।
घरेलु मैदानमा रोबर्टो फिर्मिन्हो र साडियो मानेले दुई दुई गोल गरेपछि लिभरपुलले पुनरागमन जित निकालेको हो । बर्नलीका एस्ले वेष्टवुड र जोहन गुडमण्डसनले एक एक गोल गरे ।
खेलमा सुरुवाती अग्रता भने बर्नलीले बनाएको थियो । खेलको छैटौं मिनेटमा वेष्टवुडले गोल गर्दै बर्नलीलाई अग्रता दिलाए । तर, १९ औं मिनेटमा फिर्मिन्होले गोल गर्दै लिभरपुललाई खेलमा फर्काए । २९ औं मिनेटमा मानेले गोल गर्दै लिभरपुललाई २-१ को अग्रता दिलाए ।
खेलको ६७ औं मिनेटमा फिर्मिन्होले व्यक्तिगत दोस्रो गोल गर्दै लिभरपुलको अग्रता ३-१ को बनाए । खेलको इन्जुरी समयमा बर्नलीका जोहनले गोल गर्दै खेल ३-२ को स्थितिमा ल्याए । तर, त्यसको केहि मिनेट भित्रै मानेले गोल गर्दै लिभरपुललाई ४-२ को जित दिलाए ।
जितसंगै लिभरपुलले उपाधि होडमा शीर्ष स्थानको म्यानचेस्टर सिटीमाथि दबाब कायम राखेको छ । लिभरपुलले ३० खेलबाट ७३ अंक जोडेको छ ।
लिभरपुल सिटी भन्दा १ अंकले पछि रहेको छ । ३० अंक जोडेको बर्नली १७ औं स्थानमा छ ।
