एजेन्सी । इटालियन क्लब रोमालाई पराजित गर्दै पोर्चुगिज क्लब पोर्टो च्याम्पियन्स लिग फुटबलको क्वाटरफाइनलमा प्रवेश गरेको छ ।
बुधबार राति भएको अन्तिम १६ को दोस्रो लेगको खेलमा रोमालाई अतिरिक्त समयमा ३–१ गोल अन्तरले पराजित गर्दै पोर्टो समग्रमा ४–३ को जितसहित अन्तिम आठमा पुगेको हो ।
घरेलु मैदानमा पोर्टोलाई जित दिलाउन टिक्विन्हो, मौसा मरेगा र एलेक्स टेल्सले एक एक गोल गरे । रोमाका ड्यानियल रोसीले एक गोल फर्काए ।
पोर्टोले निर्धारित समय २-१ को जित निकाल्दा समग्रमा खेल ३-३ को बराबरी हुँदा खेल अतिरिक्त समयमा गएको थियो ।अतिरिक्त समयको अन्तिम मिनेटमा एलेक्सले पेनाल्टीमा गोल गर्दै पोर्टोलाई जित दिलाए ।
यसअघि पहिलो लेगमा रोमाले २-१ को अग्रता बनाएको थियो । तर, दोस्रो लेगमा पोर्टोलाई रोक्न नसक्दा रोमा अन्तिम १६ बाट बाहिरिएको छ ।
योसंगै पोर्टो सन् २०१४/१५ को सिजनपछि क्वाटरफाइनल पुग्ने पहिलो पोर्चुगिज बनेको छ ।
