काठमाडौं । नेपाली राष्ट्रिय फुटबल टिमका मिडफिल्डर रोहित चन्द रहेको क्लब पर्सिजा जाकार्ताले ईन्डोनेसियन प्रेसिडेन्ट कपमा फराकिलो जित निकालेको छ ।
मंगलबार राति भएको खेलमा जाकार्ताले बोर्नेओ एफसीलाई ५-० गोल अन्तरले पराजित गर्यो ।
जाकार्ताको जितमा नोभ्री सेटियावनले दुई गोल गरे । यस्तै ब्रुनो माटोस,रामडानी र हेरी सुसन्टोले समान एक एक गोल गरे ।
साविकको विजेता समेत रहेको जाकार्ताले पहिलो हाफमा ३ र दोस्रो हाफमा २ गोल गर्दै फराकिलो जित निकालेको हो ।
जाकार्ताको फराकिलो जितमा रोहितले उत्कृष्ट प्रदर्शन गरेका थिए ।
रोहितले मंगलबार मात्रै जाकार्तासंग नयाँ सिजनको लागि औपचारिक सम्झौता गरेका थिए ।
रोहित गत सिजन इन्डोनेसियन लिगमा बर्षको उत्कृष्ट खेलाडी चुनिएका थिए ।
