काठमाडौं । टुसाल युथ क्लबले सहिद स्मारक 'बी' डिभिजन लिगको तेस्रो स्थान हासिल गरेको छ ।
मंगलबार भएको सुपर लिगको अन्तिम खेलमा सातदोबाटो युथ क्लबलाई २-१ गोल अन्तरले पराजित गर्दै टुसाल तेस्रो भएको हो । 'बी' डिभिजन लिगको उपाधि भने रानीपोखरी कर्नर टिम (आरसीटी) ले जित्यो ।
सातदोबाटोस्थित एन्फा कम्प्लेक्समा साजन सुनुवार राईले ३५ औं मिनेटमा गोल गर्दै टुसाललाई सुरुवाती अग्रता दिलाएका थिए । खेलको ६५ औं मिनेटमा टुसालका प्रकाश भुजेलले आत्मघाती गोल गरेपछि सातदोबाटोले खेल १-१ को बराबरी गरेको थियो । तर, खेलको ८७ औं मिनेटमा सातदोबाटोका भोजराज मगरले आत्मघाती गोल गरेपछि टुसाल २-१ ले विजयी भयो ।
जितसंगै टुसालले सुपर लिगमा ३ अंक जोड्यो । सातदोबाटोले अंक जोड्न सकेनन् । उपाधि विजेता आरसीटीले ९ अंक जोड्दा उपविजेता श्री भगवतीले ६ अंक जोड्यो ।
उपाधिसंगै आरसीटीले ८ लाख नगद प्राप्त गरेको छ । उपविजेता श्री भगवतीले ५ लाख प्राप्त गर्यो । यस्तै टुसालले ३ लाख र सातदोबाटोले २ लाख प्राप्त गर्यो ।
