काठमाडौं । सहिद स्मारक 'बी' डिभिजन लिग फुटबल अन्तर्गत दोस्रो चरणको खेलमा रानीपोखरी कर्नर टिम (आरसीटी) ले लगातार दोस्रो जित निकालेको छ । आइतबार भएको खेलमा आरसीटीले सातदोबाटो युथ क्लबलाई २- ० गोल अन्तरले पराजित गर्यो ।
एन्फा कम्प्लेक्स सातदोबाटोमा आरसीटीलाई जित दिलाउन संसार नन्द प्लानचोकेले दुवै गोल गरे । खेलको ६८ औं मिनेटमा संसारले गोल गर्दै आरसीटीलाई सुरुवाती अग्रता दिलाए । खेलको ८३ औं मिनेटमा संसारले व्यक्तिगत दोस्रो गोल गर्दै आरसीटीलाई २-० को जित दिलाए ।
जितसंगै आरसीटीले दोस्रो चरणमा २ खेलबाट ६ अंक जोडेको छ । यसअघि पहिलो खेलमा आरसीटीले टुसाल युवा क्लबलाई २-१ गोल अन्तरले पराजित गरेको थियो ।
'बी' डिभिजन अन्तर्गत नै दोस्रो खेलमा श्री भगवतीले टुसाल युवा क्लबलाई ३-१ गोल अन्तरले पराजित गरेको छ ।
श्री भगवतीको जितमा दर्शन गुरुङले दुई तथा छिरिङ पासाङ शेर्पाले एक गोल गरे । टुसालका काशीम राईले एक गोल गरे ।
श्री भगवतीको पनि यो लगातार दोस्रो जित हो । यसअघि श्रीले सातदोबाटो युथ क्लबलाई ४-३ गोल अन्तरले पराजित गरेको थियो । श्री भगवतीले २ खेलबाट ६ अंक जोडेको छ ।
४ टोली रहेको दोस्रो चरणको खेलपछि शीर्ष टोलीले उपाधि जित्ने छन् ।
