एजेन्सी । अमेरिकाको मेजर लिग सकर क्लब एलए ग्यालेक्सीले आफ्नो रंगशालाको अगाडी इंग्ल्यान्डका पुर्व कप्तान डेभिड बेकह्यामको प्रतिमा (मुर्ति) निर्माण गरेको छ ।
एलए ग्यालेक्सीले आफ्ना पुर्व मिडफिल्डरको सम्मानमा बेकह्यामको प्रतिमा राखेको हो ।
क्लबले मेजर सकर लिगको नयाँ सिजन अन्तर्गत सिकागो फायरविरुद्धको खेल अघि बेकह्यामको उपस्थितिमा प्रतिमा सावर्जनिक गरेको छ । उक्त खेलमा एलए ग्यालेक्सीले सिकागो फायरलाई २-१ ले हराएको थियो ।
म्यानचेस्टर युनाइटेडका पुर्व स्टार बेकह्यामले एलए ग्यालेक्सीबाट पाँच सिजन खेलेका थिए । एलए ग्यालेक्सीबाट बेकह्यामले २ सिजन उपाधि उचालेका थिए ।
रियल मड्रिडबाट सन् २००७ मा एलए ग्यालेक्सी गएका बेकह्यामले १२४ खेलमा २० गोल गरेका थिए ।
क्लबको रंगशाला अघि मुर्ति निर्माण भएपछि बेकह्यामले आफुलाई गर्व महसुस भएको बताए ।
'आज सपना सत्य भएको छ,' बेकह्यामले भने, 'मलाई साच्चै गर्व लागेको छ । विशेषगरि मेरो परिवार र बच्चाहरुको लागि महत्वपूर्ण रहनेछ । एक दिन उनीहरु आउने छन् र मैले प्राप्त गरेको सफलता हेर्नेछन् ।'
