एजेन्सी । एसी मिलान इटालियन सिरी 'ए' फुटबलको तेस्रो स्थानमा उक्लिएको छ । शनिबार राति भएको खेलमा सासोउलोलाई १-० गोल अन्तरले पराजित गर्दै मिलान तेस्रो स्थानमा उक्लिएको हो ।
घरेलु मैदानमा भएको खेलमा आत्मघाती गोलबाट मिलानले जित निकालेको हो । खेलको ३५ औं मिनेटमा सासोउलोका पोल लिरोलाले आत्मघाती गोल गरेका थिए । त्यहिँ गोलले मिलानले महत्वपूर्ण ३ अंक जोड्यो ।
यस्तै खेलको ६४ औं मिनेटमा आन्द्रेले रातो कार्ड पाउँदा सासोउलो १० खेलाडीमा समेटिएको थियो ।
जितपछि मिलानले २६ खेलबाट ४८ अंक जोड्यो । मिलानले डर्बी क्लब इन्टरलाई १ अंकले पछि पार्यो । ३१ अंक जोडेको सासोउलो ११ औं स्थानमा छ ।
