काठमाडौं । नेपालको कुल जनसंख्या मध्ये २५ लाखले क्रिकेट रुचाउछन् । यद्यपी, धेरै कमले मात्र १८ बर्षको उमेरमा सन्दीप लामिछानेले जति सफलता हात पारेका छन् ।
तीन बर्षअघि किर्तिपुरस्थित टियु मैदानमा सन्दीपले नामिबियाविरुद्ध खेल्दै सिनियर टोलीबाट अन्तराष्ट्रिय क्रिकेटमा डेब्यु गरेका थिए । तर, सन्दीप अहिले भारत, पाकिस्तान, अष्ट्रेलिया, क्यानाडा, हङकङ, युएई र वेष्ट इण्डिज जस्ता ठुला देशको टी-ट्वान्टी क्रिकेटका अभिन्न अंग बनिसकेका छन् ।
यति उचाईसम्म पुग्न सन्दीपलाई त्यति सजिलो भने थिएन । सबै भन्दा ठुलो चुनौती भनेको घर परिवारलाई मनाउनु वा विश्वास दिलाउनु नै थियो ।
'मेरो आमाबाबुले मलाई राम्रो विद्यार्थी भएको हेर्न चाहनुहुन्थ्यो ताकी म राम्रो पैसा कमाउन सकुँ,' दुबईमा पीएसएल खेलिरहेका सन्दीपले क्रिकइन्फोसंग भने, 'तर मसंग फरक विचारहरू थिए र मैले उहाँहरुसंग दुई-तीन बर्षको समय मागेँ ।'
क्रिकेट एकेडेमीमा आबद्द हुन सन्दीप आफ्नो आमा बाबाको अनुमतिमा विवाह गरेर गएका दिदीको घरमा गए । क्रिकेटर बन्ने सपनामा पहिलो कदम चालेका सन्दीपले आफुमा धेरै कुरा सुधार गर्नु पर्ने बुझे । त्यसैले बिहान चाडै उठेर अन्य सिक्न आउने खेलाडी भन्दा पहिले नै एकेडेमी पुग्ने गर्थे ।
'सुरु सुरुमा त मैले प्रशिक्षकसंग धेरै समय बिताउन पाइन् । किनकि बेलुका ४ बजे देखि ७ बजेसम्म क्रिकेट सिक्न आउने म जस्ता धेरै खेलाडी हुन्थे त्यसैले म दिउँसो १२ बजे नै एकेडेमी पुग्थे ताकि मैले अलि धेरै समय नेटमा र प्रशिक्षकसंग बिताउन पाउँ,' सन्दीपले सुरुवाती दिन सुनाए, 'मलाई अरु खेलाडी भन्दा फरक हुनु थियो । यसका मैले धेरै मिहिनेत गर्नु पर्छ भन्ने पनि थाहा थियो । त्यसैले म दिनको ७-८ घण्टा मेहेनत गर्ने गर्थे ।'
अरु भन्दा फरक खेलाडी बन्न सन्दीपले लेग स्पिन रोजेका थिए । सन्दीपलाई प्रकृतिले नै लेग ब्रेक र गुगली फाल्ने क्षमता दिएको थियो । तर, सुरुवातमा उनलाई सहि स्थानमा बल फाल्न भने निकै संघर्ष गर्नु पर्यो । निरन्तर सहि स्थानमा बल फाल्न उनले नेटमा धेरै समय बिताउने गर्थे ।
बंगलादेशमा सन् २०१६ मा सम्पन्न १९ औं संस्करणको यू-१९ विश्वकपका लागि नेपालली टोलीको छनोट चल्दै थियो ।
नेपालको तत्कालिन मुख्य प्रशिक्षक पुबुदु दशानायाके देश भरबाट खेलाडी छनोट गर्ने क्रममा सन्दीपले सिक्ने एकेडमीमा आइपुगे । सन्दीपमा जे देखे प्रशिक्षक दशानायके उनीबाट प्रभावित भईहाले ।
'त्यो अविश्वसनीय थियो । किनकि कुनै समय थियो मैले मौका नै पाउदैन थिए र म एक्कासी यु-१९ विश्वकपको क्याम्पमा परे ।' सन्दीप सम्झिन्छन्, 'मलाई थाहा थियो मेरो लक्ष्यको बाटो लामो छ तर सिनियर टोलीको लागि खेल्ने चुनौती त्यहाँबाट सुरु भयो ।'
यू-१९ विश्वकपमा १४ विकेट लिंदै सन्दीप सर्वाधिक विकेट लिने दोस्रो खेलाडी बने । त्यसको केहि महिनापछि हङकङमा हुने टी-ट्वान्टी बिलिट्ज प्रतियोगिता खेल्न सन्दीपलाई कोलुन कार्टूनसले बोलायो ।
सन्दीपले आफु अष्ट्रेलियाका विश्वकप विजेता कप्तान माइकल क्लार्कसंगै खेल्ने थाहा पाए । सन्दीपको क्षमता देखेर क्लार्क पनि प्रभावित भए र उनलाई सिड्नीको क्लब वेस्ट्रन सर्बर्बबाट खेल्न अष्ट्रेलिया बोलाए ।
गत वर्ष, जिम्बाबेमा भएको विश्वकप छनोट खेलमा महत्वपूर्ण भूमिका निर्वाह गरेका सन्दीपले नेपाललाई पहिलो पटक एकदिवसीय मान्यता दिलाउन समेत सफल रहे ।
सन्दीपले पहिलो पटक इन्डियन प्रिमियर लिगमा रिक्की पोण्टिङको प्रशिक्षणमा खेल्ने मौका पाए । सन्दीपले दिल्ली डेयरडेभिल्स हालको दिल्ली क्यापिटल्सबाट खेले । सन्दीपलाई दिल्लीले यस सिजनको लागि रिटेन समेत गरिसकेको छ ।
हाल पाकिस्तान सुपर लिग (पीएसएल) खेलिरहेका सन्दीपले ४ खेलबाट १० विकेट हात पर्दै उत्कृष्ट प्रदर्शन गरिरहेका छन् ।
सन्दीपको हरेक खेल नेपाली समर्थकले नजिकबाट नियाल्ने गरेका छन् । उनको प्रदर्शनले अन्य खेलाडीलाई समेत हौसला मिल्ने गर्छ ।
'एक प्रेरणा बन्नु रमाइलो लाग्छ र आफ्नो मान्छेहरुलाई उनीहरुको छोराले पनि खेलबाट केहि गर्ने सक्छ भन्ने विश्वास दिलाउन पाउँदा खुसी लाग्छ,' सन्दीप भन्छन्, 'आफ्नो देशको प्रतिनिधित्व गर्नु एक सपना पुरा हुनु हो र म अझै अरु नेपाली खेलाडी अगाडी आएको हेर्न चाहन्छु र आफ्नो जीवनमा थुप्रै सफलता हात पर्नेमा आशावादी छु ।'
सन्दीपलाई मुख्य चिन्ता भनेको नेपाल क्रिकेटको पूर्वाधार र निलम्बित क्रिकेट संस्थाको रहेको छ । जसले गर्दा अन्तराष्ट्रिय क्रिकेट परिषद (आईसीसी) ले प्रदान गर्ने सहयोगमा कटौती भएको छ । अहिले नेपाली क्रिकेट आईसीसी आफैले हेरिरहेको छ । निलम्बनमा परेपनि आईसीसीले नेपाललाई अन्तराष्ट्रिय क्रिकेटमा बन्चित गराएको छैन् ।
'जब म मेरो दिदीको घर नजिक खेल्ने गर्थे । म अझै सम्झिन्छु मेरो साथीको आमाले मलाई गली गर्नु हुन्थ्यो कि मसंग खेलेर उहाँको छोरा बिग्रिन्छ । तर, अहिले उहाँ नै मलाई उहाँको छोरालाई खेल्न प्रोत्साहन गर्न आग्रह गर्नु हुन्छ । त्यस्तो अफ्ठ्यारो दिन सम्झिदा मेरो आखाँ रसाउछ,' सन्दीपले करीयरको सुरुवात सुनाए ।
सन्दीप नेपाली खेलाडीहरुमा खेलप्रतिको माया धेरै रहेको बताउछन् । 'हाम्रो देशमा क्रिकेटमा ठुलो लगानी छैन् तर क्रिकेट प्रति माया गर्ने धेरै छन् । यस्तो अवस्था अन्य देशमा थियो भने खेलाडीहरू खेल्न छाड्ने थिए । तर नेपालमा कम सम्भावनाहरूको बावजूद पनि खेलाडीहरूले केवल खेलको प्रेमले मात्र खेल्ने गरिरहेका छन्, सन्दीपले भने ।
-इएसपीएन क्रिकइन्फोबाट साभार
-1736389050.jpg)
