एजेन्सी । इङ्ग्लिश प्रिमियर लिग फुटबलमा आज (बुधबार) विभिन्न ६ खेलहरु संचालन हुँदैछ ।
प्रिमियर लिगमा बुधबार ठुला क्लबहरु लिभरपुल, म्यानचेस्टर सिटी, म्यानचेस्टर युनाइटेड, चेल्सी, आर्सनल लगायतका क्लबहरुले प्रतिस्पर्धा गर्दैछन् ।
लिग लिडर लिभरपुलले वाट्फोर्डसंग घरेलु मैदानमा प्रतिस्पर्धा गर्दैछ । घरेलु मैदानमा लिभरपुल जित निकाल्दै शीर्ष स्थान यथावत गर्न चाहन्छ ।
लिग लिडर लिभरपुलले २७ खेलबाट ६६ अंक जोडेको छ । र, दोस्रो स्थानको म्यानचेस्टर सिटी भन्दा १ अंकले अघि छ । सिटीको ६५ अंक छ । वाट्फोर्ड ४० अंकसहित सातौं स्थानमा छ ।
लिगको दोस्रो स्थानको सिटीले घरेलु मैदानमा वेष्ट ह्यामको सामना गर्नेछ । सिटी वेष्ट ह्यामलाई हराएर लिग लिडर लिभरपुलमाथि दबाब बढाउँन चाहन्छ । यस्तै वेष्ट ह्याम सिटीलाई रोक्दै अंक तालिका सुधार गर्न चाहन्छ ।
यस्तै चेल्सीले घरेलु मैदानमा तेस्रो स्थानको टोटेनहमको सामना गर्नेछ । टोटेनहम चेल्सीलाई हराएर शीर्ष दुई क्लबसंगको अंक दुरी कम गर्न चाहन्छ ।
टोटेनहमको ६० अंक रहेको छ । छैटौं स्थानको चेल्सीको ५० अंक छ । चेल्सी टोटेनहमलाई हराएर शीर्ष चारमा पुग्न चाहन्छ ।
लिगको पाँचौ स्थानमा रहेको म्यानचेस्टर युनाइटेडले क्रिस्टल प्यालेससंग उसैको मैदानमा खेल्दैछ । युनाइटेड क्रिस्टललाई हराउँदै तेस्रो स्थानमा उक्लन चाहन्छ । युनाइटेडको ५२ अंक छ ।
त्यस्तै आर्सनलले घरेलु मैदानमा बर्नेमाउथसंग खेल्दैछ । चौथो स्थानको आर्सनलको ५३ अंक छ ।
लिग अन्तर्गत बुधबार नै साउथह्याम्पटन र फुलहमबीच खेल हुनेछ ।
