एजेन्सी । स्पेनिस कोपा डेल रे फुटबल अन्तर्गत सेमिफाइनलको दोस्रो लेगमा आज (बुधबार) राति दुई चिपरिचित प्रतिद्वन्दी रियल मड्रिड र बार्सिलोनाबीच प्रतिस्पर्धा हुँदैछ ।
एल क्लासिको भिडन्तको नामले चर्चित रियल र बार्सिलोनाबीचको खेल नेपाली समय अनुसार राति १:४५ बजे सुरु हुनेछ । उक्त भिडन्त रियलको घरेलु मैदानमा हुनेछ ।
सान्टीयागो बेर्नाबेउमा प्रतिस्पर्धाका लागि मैदान उत्रदा दुवै टोलीको लक्ष्य फाइनल पुग्नु हुनेछ । यस्तोमा जित निकाल्न दुवै टोलीले आफ्नो मुख्य अश्त्र प्रयोग गर्नेछन् ।
बार्सिलोनाको घरेलु मैदानमा भएको पहिलो लेगको खेल १-१ गोलको बराबरीमा सकिएको थियो । पहिलो लेगमा लुकास भास्क्वेजले गोल गर्दै रियललाई सुरुवाती अग्रता दिलाएका थिए । तर, माल्कोमले दोस्रो हाफमा गोल गर्दै बार्सिलोनालाई खेलमा फर्काएका थिए ।
पहिलो लेगमा बार्सिलोनाले कप्तान लियोनल मेस्सीलाई दोसो हाफमा मैदान छिराएको थियो । रियलको मैदानमा भने कप्तान मेस्सी सुरुवाती -११ मा पर्ने छन् ।
रियलले ग्यारेथ बेललाई सुरुवातमा मैदान उतार्ने सम्भावना कम रहेको छ ।
दुई टोलीबीचको विजेताले भ्यालेन्सिया र रियल बेटिसबीचको विजेतासंग खेल्नेछ । दुई बीचको पहिलो लेग २-२ गोलको बराबरीमा रहेको छ ।
