काठमाडौं । थाईल्याण्डमा जारी आईसीसी महिला विश्वकप क्रिकेट अन्तर्गत एसिया छनोटको अन्तिम खेलमा नेपालले कुवेतलाई पराजित गरेको छ । बुधबार भएको खेलमा नेपालले कुवेतलाई ३० रनले हराएको हो ।
बैंककस्थित एसियन ईन्सिटच्युट अफ टेक्नोलोजीको मैदानमा नेपालले दिएको ११७ रनको लक्ष्यसहित जवाफी ब्याटिङ गरेको कुवेतले २० ओभरमा ९ विकेट गुमाएर ८६ रन मात्र बनाउन सक्यो ।
कुवेतका लागि कप्तान मार्याम ओमारले सर्वाधिक २९ रन जोडिन् । यस्तै प्रियादा मुरालीले १४ तथा सब्रिन जाकी र मारियामा हेदरले समान १२/१२ रन बनाए ।
कुवेतलाई सस्तैमा समेट्न कप्तान रुबिना क्षेत्रीले ह्याट्रिक विकेट लिईन् । रुबिनाले अन्तिम ओभरको अन्तिम ३ बलमा लगातार विकेट लिएकी थिईन् । कुवेतलाई अन्तिम ओभरमा ३५ रन चाहिएको अवस्थामा बलिङ गर्न आएकी रुबिनाले पहिलो ३ बलमा एक वाईड सहित चार रन खर्चेकी थिइन् । त्यसपछिको बलमा भने रुबिनाले लगातार विकेट लिईन् ।
अन्तिम ओभरको चौथो बलमा खादिजा खालीललाई बोल्ड गर्दै रुबिनाले आफ्नो पहिलो तथा नेपालको लागि सातौं विकेट झारिन । पाँचौ बलमा रुबिनाले मदिहा जुबेरीलाई पनि बोल्ड गर्न सफल भईन् । त्यसपछि छैटौं बलमा जिफा जिलानीलाई बोल्ड गर्दै रुबिनाले ह्याट्रिक पुरा गरिन् ।
यस्तै करुणा भण्डारीले ३ विकेट लिईन् ।
यसअघि टस हारेर पहिले ब्याटिङ गरेको नेपालले पुरै २० ओभर खेल्दै ७ विकेट गुमाएर ११६ रन बनाएको थियो ।
खराब सुरुवात गरेको नेपालको लागि बिन्दु रावलले अविजित रहदै सर्वाधिक २८ रनको योगदान दिईन् । ४८ रन जोड्दा ५ विकेट गुमाईसकेको नेपालको सम्मान जनक योगफलमा बिन्दुले ४९ बलमा एक चौका प्रहार गरिन् । कप्तान रुबिना क्षेत्रीले १३ बलमा ३ चौकासहित २२ रन बनाईन् ।
यस्तै नेरी थापाले १९, काजल श्रेष्ठले १८ रन जोड्दा इन्दु बर्मा र रोमा थापाले समान ७/७ रन बनाईन् । नेपालकी ओपनर सिता राना मगर र सरिता मगर सुन्य रनमा पेभेलियन फर्किए ।
कुवेतका मर्याम ओमर र प्रियादा मुरालीले समान २/२ विकेट लिईन् ।
नेपालको ग्लोबल छनोट सम्भावना कसरी सकियो ?
अन्तिम खेलमा कुवेतलाई पराजित गरेपनि नेपाल विश्वकपको ग्लोबल छनोटमा पुग्न असफल भएको छ । छनोट शीर्ष एक टोलीले ग्लोबल छनोटमा स्थान बनाउने प्रावधान रहेको थियो ।
तर, कुवेतलाई फराकिलो अन्तरले पराजित गर्न नसक्दा नेपाल नेट रन रेटमा थाइल्याण्डसंग पछि पर्दै ग्लोबल छनोटमा पुग्न असफल भएको हो ।
नेपालले ६ खेलबाट १० अंक जोडेको छ । र, नेपाल दोस्रो स्थानमा रहेको छ । थाइल्याण्ड १० अंक जोडेर शीर्ष स्थानमा रहदा युएई ८ अंक जोडेर तेस्रो स्थानमा छ ।
यस्तोमा नेपालको ग्लोबल छनोट यात्रामा मुख्य बाधक थाइल्याण्ड नै बन्यो । राउण्ड रोबिनको आधारमा जारी छनोटको ६ खेलमा ५ जित निकाल्न सफल नेपाल थाइल्याण्डसंग नै पराजित भएको थियो । गत बिहिबार भएको दोस्रो खेलमा थाइल्याण्डसनग ५८ रनले पराजित भएको थियो ।
शीर्ष स्थानको थाइल्याण्डले अन्तिम खेलमा आजै युएईसंग खेल्दैछ । थाइल्याण्ड र युएईबीचको खेलले ग्लोबल छनोटमा पुग्ने टोलीको तय हुनेछ ।
थाइल्याण्डको ग्लोबल छनोटमा पुग्ने सम्भावना बलियो रहेको छ । युएईलाई हराएमा १२ अंकसहित थाइल्याण्ड ग्लोबल छनोटमा पुग्नेछ । ग्लोबल छनोटमा पुग्न युएईलाई फराकिलो जितको आवश्यकता रहेको छ ।
