धनगढी । तेस्रो संस्करणको धनगढी प्रिमियर लिग (डीपीएल) क्रिकेटको इलिमिनेटरमा आज (बिहिबार) रुपन्देही च्यालेन्जर्स र महेन्द्रनगर युनाईटेडबीच प्रतिस्पर्धा हुँदैछ ।
फाप्ला क्रिकेट मैदानमा रुपन्देही र महेन्द्रनगरबिचको इलिमिनेटर खेल अपरान्ह १२:३० मा सुरु हुनेछ । र, दुवै टोली जित निकाल्दै क्वालिफायर्स पुग्ने लक्ष्यसहित मैदान उत्रने छन् ।
लिगको तेस्रो स्थानमा रहदै प्ले अफमा स्थान बनाउन सफल बसन्त रेग्मीको कप्तानीमा रहेको रुपन्देही महेन्द्रनगरविरुद्ध मैदान उत्रदा समूह चरणको नतिजालाई कायम राख्ने लक्ष्यमा हुनेछ । समूह चरणको भेटमा रुपन्देहीले महेन्द्रनगरलाई २ रनले हराएको थियो ।
यता, शरद भेषवाकरको महेन्द्रनगर भने समूह चरणमा व्यहोरेको हारको बदला लिने योजनामा हुनेछ । लिग चरणमा उत्कृष्ट प्रदर्शन गर्न नसकेको महेन्द्रनगर राम्रो नेट रन रेटको आधारमा चौथो स्थानमा रहेर प्ले अफ पुगेको हो । महेन्द्रनगर लिग चरणको प्रदर्शनलाई बिर्साउने लक्ष्यमा समेत हुनेछ ।
रुपन्देही र महेन्द्रनगरबिचको विजेताले फाइनल प्रवेशका लागि दोस्रो क्वालिफायर्समा काठमाडौं गोल्डेनन्सको सामना गर्नेछ ।
काठमाडौं पहिलो क्वालिफायर्समा सिवाईसी अत्तरियासंग ४१ रनले पराजित भएपनि दोस्रो क्वालिफायर्स खेल्ने मौका पाएको हो । अत्तरिया भने शनिबार हुने फाइनलमा प्रवेश गरिसकेको छ ।
