एजेन्सी । बिग बासमा लिगको उपाधि भिडन्तमा नेपाली लेग स्पिनर सन्दीप लामिछाने सम्मिलित मेलबर्न स्टार्स पराजित भएको छ । आईतबार भएको मेलबर्न डर्बीमा रेनिगेड्ससंग पराजित हुदै स्टार्स उपविजेतामा सिमित बनेको हो ।
उपाधि भिडन्तमा स्टार्स १३ रनले पराजित हुन पुग्यो ।
१ सय ४६ रनको लक्ष्य पछ्याएको स्टार्सले ७ विकेटको क्षतिमा १ सय ३२ रन मात्र जोड्न सक्यो । ओपनर वेन डन्कले ५७ र मार्कोस स्टोनिसले ३९ रन बनाउनु बाहेक अन्य खेलाडी चल्न सकेनन् ।
यसअघि, टस हारेर पहिले ब्याटिङ गरेको रेनिगेड्सले पुरै २० ओभर खेल्दै खेल्दै ५ विकेट गुमाएर १४५ रन बनायो ।
रेनिगेड्सका टम कोपरले अविजित ४३ तथा ड्यानियल क्रिस्टियनले अविजित ३८ रन जोडे । स्टार्सका एडम जाम्पा र ज्याक्सन बर्डले २/२ विकेट लिए ।
नेपालका सन्दीपले किफायती बलिङ गरेपनि विकेट लिन सकेनन् । सन्दीपले ४ ओभर बलिङ गर्दै १६ रन खर्चिए ।
यसअघि सन्दीपको टिम स्टार्सले होबार्ट हुरिकेन्सलाई ६ विकेटले पराजित गर्दै फाइनल पुगेको थियो । यस्तै रेनिगेड्सले सिड्नी सिक्सर्सलाई ३ विकेटले पराजित गर्दै स्टार्ससंगको भेट पक्का गरेको थियो ।
